Kombîyayîşê Heyetê Pêroyî yê 18. yê Kongreya Neteweyîye ya Kurdistanî çend rojî verê Hollanda de ame viraştene. Çar parçeyê Kurdistanî ra û teberê welatî ra temsîlkarê KCK, YNK, Goran, Tevgerê Îslamî, Partîya Komunîste ya Kurdistanî, Partîya Suryanî, organîzasyonanê cinîyan, elewîyan, êzidîyan, zerdeştîyan, yarsanîyan, hewramanan û feylîyan tewrê ci bîyî.
Hemserekê KNKyî Rêbwar Reşîdî va ‘nakokî û problemê mabênê partîyanê kurdan tewr zaf dişmenanê Kurdistanî şa kenê’ û wina dewam kerd: “Bitaybetî zî Tirkîya û Îran wazenê ke nakokîyê ke mîyanê kurdan de yê bibê pîl, çunke ê nêwazenê yewîya neteweyî mîyanê kurdan de virazîyo. Kurdistan de xeylî bawerî û kulturan ra şarî estê. Nê şarî yewbînan nas kenê û hurmet ramojnenê. Şarî mîyan de problem çin o. Gama bajarêkê kurdan de problemêk virazîyeno Suleymanîye ra heta Amed, Amed ra heta Mahabad û Mahabad ra heta Qamişlo şar wayîr ro yewbînan vejîyeno. Şarî de problemê yewîye çin o, mabênê partî û sazîyan de esto. ”
Reşîdî vat: “Sey KNK gureyê ma yo tewr pîl problemanê mabênê partîyanê kurdan raşte ra wedartiş o. Şarê kurdî wazeno ke partîyê kurdan bêrê têhet, aştîya mîyanê xo virazê û dîyalogêkê neteweyî virazê. Çi heyf ke partîyê ma yê sîyasîyî nizdê nê nêbenê. Ocalanî seva şexsê xo nê seva azadîya şarê xo mucadele kerd. Sere de dewleta tirkî heme dinya zano ke azadîya şarê kurdî azadîya Ocalanî dir têkildar a. Cok ra şer Îmrali ra dîyena destpêkerdene. Ma do sey KNK verê heme çîyî seba azadîya Ocalanî hîna zaf bixebetîyê.”
ANF / DEN HAAG