Ma do îdeolojîyê cenî ya Kurd dinya ra biresnê

BERÎTAN CANOZER / JINNEWS/AMED

Tevgerê Cenîyê Azade bi şiara ‘Ma cenî yê, seba azadîya xo ewta de yê û seba bedilnayiş ser lingan de yê’ 2 rojî Amed de konferansêk viraşt. Konferansî ra bajarê Tirkîyaye rê cenîyan bi cilê netewî beşdar bîyê. Cenîyan nexşeraya xo dîyar kerd.

Aktîvîsta TJAyî Neslîhan Acar konferans ser o vat ke nêzdî 700 kesî beşdarî konferansî bîyê û wina vat: “Ma verê konferansî zaf bi nîqaş kerd. Çimkî na pêvajoye de 700 cenî de yew caameyiş, muhîm û erjîyaye yo. Nika vera qezencê cenîyan hêrişê tewir bi tewir yenî kerdiş, her roj qetilkerdişê cenîyan virazîyeno. Cenî ke xo rêxistin kenî vera înan teda û zilm zêdîyenî û nika bi desan sîyasetmendarê ma cenî hepisxaneyan de yê.”

Polîtîkayê şerî yê taybet

Aktîvîsta TJAyî Acar aşkera kerd ke serra 2019î seba cenîyan serra xoverdayişî bî û wina domna: “Serra 2019 de cenîyan her tim rasteyan de bîyê. Vera tecrîdî grevê vêşanan de dayikan rayberî kerdê. Nika kampanyaya ma ‘Ti zî ward ser lingan’ esta, çarçiweya na kampanya zî ma heme kuçe û taxan gêrayê. Kotî de yew cenî esta ma xo resna. Xebatê ma do bidomyê. Cenîyan qetil benê la qetilê înan nînî dîyîş. Taybetî cenîyê ciwan xo kişenê. Ma konferans de taybetî na babete ser o vindertê. Ma nîqaş kerd ke do senî polîtîkayê şerî yê taybet aşkera bikê.”

Ma do Jîneolojî heme cenîyan ra biresnê 

Acar pare kerd ke ê tevgerê cenîye yê, no ser zî rolê înan ê heme cenîyan rêxistinkerdiş esto û wina qedîna: “Tayînê qewiman ra pey sazîyê cenî ameyî qefelnayiş. Vera nê polîtîkayan zî cenîyan dest pê xo rêxistin kerdê la teda û zilm zêdîyayê. Hema zî teda û zilm domyenê. Ma do pêroyina dinya ra îdeolojîya cenîyê Kurd biresnê.”