Înîsîyatîfê Rojnamegeranê Azadan (OGÎ) derheqê zext û tedayê ke aşma tebaxe de vera rojnamegeran de bîyî de raporêk aşkere kerd û bale ant neheqîyan ser. Rapor hetê Verfekê OGÎ Hakki Boltan û Edîtora Şûjinî Sîbel Yuklere ra ame wendiş û zaf hûmare de rojnamegerî zî piştî dayî kombîyayîşî.
Yuklere va ‘zext, teda û neheqîyê ke vera rojnamegeran de benîy aşma tebaxe de zî dewam kerdî’ û wina domnaye: “Aşma tebaxe de 14 rojnamegerî ameyî tewqîfkerdiş. Dinya de welatê ke tewr zaf tede neheqîyî benî de hûmara ke qasê serrêkî de yenî tewqîfkerdiş, Tirkîya de aşmêk de tewqîf benî. Lîderê dinyayî êdî neheqîyê ke Tirkîya de vera rojnamegeran de benîy reyde eleqeder nêbenî. Ewropa zî tena rojnamegerê ke welatîyê ci yî reyde eleqeder bena û seba serbest veradîyayîşê înan dîplomasî meşnena. No çîyêko seqet o; çimkî dinya de heme rojnamegerî seyyewbînan î. Ganî heme vengdayîşî seba heme rojnamegeran bêrî kerdiş.”
Yuklere dewamê qiseykerdişê xo de va ‘Tirkîya de pêro pîya 180 rojnamegerî tewqîfkerde yî’ û wina domnaye: “Na rewşe seba îqtîdarî çîyêko bêro şermkerdiş o. Ma reyna zî vanî, rojnamegerî suc nîya û ma rojnameger î. Tewqîfbîyayîşê ma reyde rojnamegerî nêqedîyena. Na aşme zî çîyê ke vera rojnamegeran de benîy nêbedilîyayî. Na aşme rojnameyê Rojeva Medya, Rojname Şûjin û dîhaber ameyî padayîş. Ma rojnameger î û ma rojnamegerîya xo domnenî. Bêrê ma rojnamegeran zîndan ra bivejî û wa Tirkîya azad biba.”
Bîlançoya aşma tebaxe
Raporo ke hetê OGÎ ra seba aşma tebaxe ame aşkerekerdiş wina yo: “180 rojnamegerî zîndan de yî, 30 rojnamegerî ameyî tepiştiş, 14 rojnamegerî tewqîf bîyî, 2 rojnamegerî tehlîye bîyî, 4 keyepelê xeberan 14 reyan hetê BTKyî ra ameyî astengkerdiş, 3 sazî û dezgeyê çapemenîye ameyî padayîş,14 rojnamegerî ameyî mehkemekerdiş. Dest ronîya pasaportê rojnamegerêkî û vejîyayîşê ci yê teberê welatî ame qedexekerdiş.”
Dezgeyî do teșhîr bikerî
Heto bîn ra prosesê şerî ke 7ê Hezîrana 2015î ra dima her ke şî hîra bî de sazî û dezgeyê demokratîkî raştê hêrişanê girdan ameyî. Labelê tîya de hêrişê tewr girdî vera sazî û dezgeyê çapemenîye yê kurdan de bîyî. Dewlete kamcîn wext dest bi qetlîyaman kerde, o wext hêrişê sazî û dezgeyanê çapemenîya azade û bitaybetî zî sazî û dezgeyan padaye. Na çarçewa de bi desan reyan ajansê JINHA û DÎHAye asteng kerde û dima ra padaye. Nê demanê peyênan de dewlete polîtîkayanê xo yê qetlîyam û çinîkerdişî domnaye û na çarçewa de Rojname Şûjin, dîhaber û Rojeva Medya padaye. Labelê sazî û dezgeyê çapemenîye yê kurdan teşhîrkerdişê şîddetê dewlete domneno.
NAVENDA XEBERAN