Vizêr serrgêra 26. yê Qetlîyamê Madimakî ke 2ê Temmuza 1993î de amebi kerdene û netîceyê ci de 33 nuştox, hozan, roşinvîr û hunermendî amebî qetilkerdene bi. Babete ser o Meclîsê Cinîyanê Sosyalîstan îzehetêko nuştekî weşêna. Meclîsî îzehet de dîyar kerdo ê ke otelî veşna, bi desan cananê ma kiştî û hendêna zî birîndar kerdî.
Meclîsî da zanayene ke Wezîrê Edaletî û Serekwezîrê ê wextî qetlîyam pawitbî û wina va: “Herçiqas ke 26 serrî derbaz bîyî zî, heta nika edalet nêameyo ca. Hîna zî wijdanê merdimîye ra gonîye şona. Çimkî herinda ke berpirsîyarî bêrî cezakerdene, xelate dîyaye înan. Seba ke Elewîyî wayîrê nasname û bawerîya xo vejîyenî, raştê qetlîyam û cîyakarîye yenî. Eke Qetlîyamê Sêwazî reyde têrî biameyêne mendene, Qetlîyamê Roboskê, Pirsûs û Anqara nêbîyênê.”
Meclîsî dewamê îzehetê xo de wina vato: “Sêwaz ra heta Pirsûsî têkoşînê edaletî dewam keno. Ma wayîrê her têkoşînê cinîyan vejîyenî û seba ke ma hesab bipersî ma veng danî înan. Ma do waştişê xo yê edaletî bidomnî. Ma cinîyî qetlîyam xo vîra nêkerd û ma do nêkerî zî. Ma do seba her cano ke qetlîyam de merd, têkoşîn bidî.”
JINNEWS / AMED