Salih Ozdemîro ke bi nameyanê Delîl û Pîro yeno zanayîş, bi serran vera sîstemê dagîrker yê tirkan de xover da û seba ci hepisxaneyî de mend. Dima ra wexto ke hepisxaneyî ra vejîya, beşdarê Tevgerê Azadîya Kurdî bî. Ozdemîr bi serran mîyanê çapemenîya azade de bi hawayo aktîf cayê xo girewt. Tewr peynî seba tedawîya xo 13ê kanûne de Bruksel de nêweşxane de amelîyatê mezgî vîyarna û 25ê kanûne de 56 serreyîya xo de welatê xo ra dûrî, surgun de wefat kerd.
Seba Ozdemîrî Bruksel de salonêk de merasîm ame viraştiş. Tabutê Ozdemîrî milan ser de bi siloganan ame kiriştiş. Merasîmo ke bi seyan kesî beşdar bîyî de nawitişê sînevîzyonî virazîya û demê hîsinî ameyî ciwîyayîş. Nameyê keyeyê Ozdemîrî ser Nadîr Ozdemîr, Onur Ozdemîr û Sînem Ozdemîr beşdarê merasîmî bîy.
Hemserekê KONGRA-GELî Remzî Kartalî qisey kerd û wina va: “Şehadetê embazê Delîlî seba ma zaf giran bî. Embaz Delîlî emrê xo seba nê têkoşînî feda kerd û 22 serran ra zêde hepisxane de mend û têkoşînêko gird da. Ma xo sey deyndarê ci vînenî û ma do heta peynî têkoşînê ci bidomnî.” Ser nameyê RAJINî zî Gulîstan Îkeye qisey kerde û va ‘Ma tîya de rayberêk têkoşînî oxir kenî’ û wina domnaye: “Ma do rayîrê ci de şêrî û heta peynî têkoşînê ci bidomnî.”
Pîrê elewî Riza Yagmurî zî dîyar kerd ke Ozdemîrê heta peynîya emrê xo seba raştîyan têkoşîn dayo.
Cenazeya Ozdemîrî bi deyîra ‘Heval Andok’ Brukselî ra ver bi welat ame oxirkerdiş.
BRUKSEL