Cinîyê Karakoçanijî yê ke xebatanê weçînitişî rê serkêşî kenî, dîyar kerdî ke do 31ê Adare de qayûmî bierşawî Anqara û wina vatî: “Karakoçan her tim yê ma bî. Do timî wina zî bimano. Ma do tesilî projeyanê xo yê nîmcetan temam bikerî.”
Weçînayîşê herêmî rê wextêko kilm mend û partîyê sîyasî ez dayî xebatanê xo. Partîya Demokratîke ya Şaran (HDP) seba şaredarîyanê ke qayûm tede ameyî bicaakerdiş, tepîya bigêra bi coşêko gird xebatanê xo rayîr bena. Qezaya Karakoçanî ya Xarpêtî ke hemşaredarê aye ameybî tepiştene û qayûm tayînê herinda înan ame kerdene, hetê HDPyî de ya. 7 ra heta 70î her kes seba weçînitişî seferber bîyo û taybet zî cinî vejîyenî aver.
Derheqê babet de de cinînê Karakoçanij yê bi nameyê Cennet Ayik, Endama Meclîsê Cinîyan ya HDPyî Nur Aytemur û Hemseroka Partîya Herêmê Demokratîkî (DBP) ya Karakoçanî Remziye Kiliçe qisey kerdî.
Cennet Ayike qiseykerdişê xo de dîyar kerde ke bawerîya înan temama ke do HDP weçînitişî de serkewte bibo û tarîxê Karakoçanî arde vîr û wina va: “Karakoçan têkoşîno heqin de bedelêko gird dayo. Ma do zî hewl bidî lafiqê înan bibî. Karakoçan her tim yê ma bî. Do timî zî wina bo.”
Qayûm projeyê ma yê cinîyan vindarna
Endama Meclîsê Cinîyan ya HDPyî Nur Aytemure zî derheqê xebatê weçînitişî yê Karakoçanî de qisey kerde û va: “Ma hewldayîşê dewrgirewtişê kursî de nîyî. Heme hewldayîşê ma seba projeyanê ma ke nîmcet mendî yî. Badê ke qayûm tayînê şaredarîya Karakoçanî bî, xeylê projeyê ma nîcet mendî. Qayûm heminan da vindetene. Ma do komeleya cinîyan, park û merkezê ciwanan newe ra akerî.”
Ma do qayûman bierşawî Anqara
Hemsereka DBPyî ya Karakoçanî Remziye Kiliçe zî wina va: “Ma hetê erşawitişê qayûman de bi qerar î. Ma do qayûman bierşawî cayê ke înan ma rê erşawitî. Ma bi qerardarî xebatan rayîr benî. Ma do têkoşînê heme embazanê xo yê zindanan biresnî serkewtişî. Cinî, cuye azadî.”
XARPÊT