Pêşnîyazê bedilnayîşê qanûno bingeyî yo ke Serekkomarîya Partîyî zî mîyanê xo de hewêneno, turê ci yo yewin qedîya. Nika ra pey do turê dîyin dest pêbikero û eke turê dîyine de zî netîceyê sey turê yewin bivejîyo, o wext do no pêşnîyaz şêro şarî ver.
Babete ser o Sekretera Pêroyî ya Konfederesyonê Sendîkaya Kedkaranê Şorişgeran (DÎSK) Arzu Çerkezogluye qisey kerde.
Çerkezogluye va ‘hukmatê AKPyî 7ê Hezîrane ra nata netîceyê weçînayîşî çinî hesibnayo’ û qiseykerdişê xo wina domnaye: “Hukmatê AKPyî welat açarnayo welatê zext, şîddet, şer û mergî. Hukmat sîyasetêko welat parçe keno, şîddetî zêde keno û cîyayî virazeno, dano meşnayîş.”
Qanûno bingeyî pêameyîş o
Çerkezogluye dewamê qiseykerdişê xo de va ‘rojeva rastikêne ya şarî huzur, aştî, biratî, krîzê ekonomîk, bêkarî û vêşanî ya’ û wina domnaye: “Şert û mercê OHALî de qanûno bingeyî nîno bedilnayîş. Çimkî qanûno bingeyî pêameyîşêko hîra yê komelî yo. Labelê wazenî ke çîyo ke fekê kesêk ra vejîyenî sey qanûnî bihesibyî, welatêko winasî awan kenî. Wazenî Tirkîya biaçarnî cayo ke heme mekanîzmayê demokratîke werte ra ameyî wedarnayîş û sîstemêko yew kesî awan bikerî. Sîstemê Serekî ra zêde çîyêko hîna cîya esto. Wazenî rejîmê zextan awan bikerî. Proseso ke bi hawayo fîîlî estbî, wazenî nê prosesî bikerî qanûnî. Yanî seba ke selahîyetî dewrê kesêk bêrî kerdiş, ma prosesanê weçînayîşî cuyenî.”
Ma do şarî rêxistine bikerî
Çerkezogluye dewamê qiseykerdişê xo de bale ante referandumo ke seba qanûno bingeyî yê 82yî amebî viraştiş û wina va: “O wext netîceyê referandumî de sera 95 vatbî ya. Labelê seba ke meşrû nêbî û goreyê pêameyîşê komelî nêamebî viraştiş, mîyanê şarî de nêame qebulkerdiş. Tirkîya de 60 reyan hewl ameyo dayîş ke qanûno bingeyî bêro bedilnayîş, labelê nêbîyo. Eke no pêşnîyaz Meclîs ra bivîyaro û seba referandumî bêro şarî ver, ma do vera nê sîstemî de şarî rêxistine bikerî ke wa şar vajo nê. Reyna eke no pêşnîyaz prosesê referandumî de bêro qebulkerdiş, o wext cinî, kedkar, ciwan û wayîrê rastikênî yê welatî do zaf çîyan vînî bikerî.”
Çerkezogluye peynîya qiseykerdişê xo de wina va: “Ma do vera Sîstemê Serekî de şarî rêxistine bikerî. Seba kedkaran îdareyo ke heme çîyê ci mîyanê her di lewanê kesêk de bibo, yeno manaya vînîkerdişê heme qezencan. Nê semedî ra o wext do komelê Tirkîya zaf çîyan vînî bikero. Cok ra ma do nê prosesî de çîyo ke seba başîya kedkaran o, mîyanê şarî de nêyî rêxistine bikerî. Seba rêxistinkerdişî zî ma do partîyê sîyasî ra heta komeleya elewîyan û heme muxalîfan mîyan de xebatanê xo bidomnî.”
SAKIP YAŞAR / RUKEN DEMÎR / DÎHABER / ÎZMÎR