AYSEL IŞIK/ŞÛJIN/AMED
Tirkîya de sîstemê perwerdeyî de her roje sererastkerdişê neweyî yenê kerdiş û wexto ke nê sererastkerdişî yenê kerdiş zî tesîrê psîkolojîk û sosyolojîk yê domanan esas nîno girewtiş. Wezîya Perwerdeyo Mîllî (MEB) zî verê cû reyna îmze eşte peymanêka newe. Weqfê Ensarî ke bi îstîsmarkerdişê domanan yeno zanayîş reyde peymana 5-10 serrî ameye kerdiş.
Hemsereka Egîtîm Senî yê Amedî yê Hûmar 1î Hatîce Efeye babete ser o qisey kerde û etirîyayîşê xo arde ziwan.
Efeye dîyar kerde ke peymana ke bi Ensarî dir ameye îmzakerdiş lingê projeyê ‘awankerdişê neslo newe ya’ û wina dewam kerde: “Komel vera nêyî de yo. Planê îqtîdarî do vera nêyî apey bikero. AKPyî bi kombîyayîşêk verê cû sinyalê na peymane dayo. Tayyîp Erdoganî beşdarê kombîyayîşêkê Weqfê Ensarî bîbî û vatbî ‘Ma çend serrî yo îqtîdar de yî, la ma sey partî nêbî îqtîdarêko kultur û komelî’. Goreyê mi no talîmatêk bî.”
‘Ma do têkoşîn bidê’
Efeye daye zanayîş ke peymana ke ameya îmzakerdiş de, hamnanî do semîner û kampî ke bêrî viraştiş, binê destê Weqfê Ensarî de bibî û wina va: “Wendekaran do bi nameyê bînan bîşêrî sewbîna cayan. Çimkî Weqfê Ensarî verê cû bi hedîseyê îstîsmarî ameybî rojeve. Ma do domananê xo teslîmê înan nêkerî û ganî keyeyî vera nêyî de bivinderî. Ma do seba sîstemêko ilmî û laîk têkoşînê xo bidomnî.”