Welatîyê ke zulmê DAIŞî ra remaybî û ameybî Dîlok, dima ra wexto ke dîyî ke nêşkenî bajarê Dîlok de bicuyî, reyna peyser agêrayî/agêrenî Kobanê. Welatîyê ke reyna agêrenî Kobanê, bi destê xo Kobanê newe ra awan kenî. Nînan ra yewe zî welatî Elî Xidro yo. Babete ser o Elî Xidro qisey kerd.
Zehmetîyê koçî
Xidroyî va ‘wextê şerî de ez bi 6 domananê xo mecbûr menda ke Kobanê ra bivejîya’ û qiseykerdişê xo wina domna: “Wexto ke şer dest pêkerd, mi demêk çeteyan reyde şer kerd û badê ke şer giran bî, ez mecbûr menda ke Kobanê ra bivejîya. Dima ra ez derbazî Tirkîya bîya û nizdîyê 2 aşmî Dîlok de menda. Dîlok de ma her çiqas ke xebetîyayêne zî ma heqê keda xo nêgirewtêne. Ti kes Dîlok de ma herinda merdimî de nêhesibnayêne.”
Xidroyî qiseykerdişê xo de va ‘wexto ke ma agêrayî Kobanê, keyeyê ma heme rijîyabî’ û qiseykerdişê xo wina qedêna: “Bajarê ma de yew şero gird qewimîyabî. Zalimê ke çar hetê dinya de kom bîbî, waştî ke welatê ma bikerî gola gonîye. Şerwanê ma bi bedelanê giranan welatê ma pawitî. Nika zî wayîrvejîyayîşê mîrasê şerwanan berpirsîyarîyêka gird a. Ma hewl danî ke bibî layîqê nêyî. Ez veng dana kobanêyijê ke Kobanê teriknaybî, wa yew parçeyê nano wişk yê înan bibo, la wa o zî erdê azade de bibo.”