Hemsereka Sendîkaya SESî ya Şûbeya Wanî Fatma Arslane zî derheqê îxracan de qisey kerde.Arslana ke bi 33 embazanê xo ameybî îxraçkerdiş, wina va: “Ez 25 serrî xebetîyaya û mi karê xo bi hawayo bieşq kerdêne. Seba ke ma muxalîf bîy, ma karî ra ameyî eştiş. Wazenî yê ke vera înan de sere nêronenî, bi vêşanîye terbîye bikerî. Mi tim bi hawayo xebatkarêka weşîye ya şarî têkoşînê xo domna. Çîyêko kewt milê mi ser de mi kerd. Çîyo ke sereyê mi tîk keno, têkoşînê mi yê sendîka yo. Ganî her kes nê têkoşînî mîyan de ca bigîro.”
Bingeyê ci yeno eştiş
Arslane dewamê qiseykerdişê xo de Nurîye û Semîh ke 146 rojî yo ke grevê vêşanî de yî arde vîr û wina va: “Xoverdayîşê înan zaf bimana yo û hêz dano xoverdakaranê bînan. Serekkomar bi xo vatbî ‘lazim o ma xebatkaran ser de şêrî û ma 657î biqedênî’. Serekomar ma vera xo de sey hêz vîneno. Hewl dano ma zeyîf bikero û bi no hawa bingeyê dîktatorî erzeno. Ma heqdar î û ma do peyser biagêrî karê xo.”
WAN