Osman Ehmedo ke keyeyê ci ra 4 kesî hêrişê çeteyan de amebî qetilkerdene, qala wextê qetlîyamî kerde û wina va: “Ê ameyî û şîyî, labelê ma bi seserran o ke nê erdan ser o yî. Dejê her serkewtişî estî. Welatê merdimî namûs û rûmetê merdimî yo. Kamcîn wext pawitişê erd û welatî kewto milê ma, ma hertim amade yî.”

ERSÎN ÇAKSU / ANF / KOBANÊ

Çend serranê peyênan de qetlîyamanê tewr girdê ke Kurdan dîyî ra yewe zî Qetlîyamê 25ê Hezîrane ke hetê çeteyanê DAÎŞî ra ame kerdene yo. O wext grûbêka girde ya çeteyan Berxbotan û merkezê bajarî yê Kobanê de sîvîlan hedef girewt û 242 sîvîlî û 30 şerwanî şehîd bîyî.

Badê ke Kobanê de serkewtiş ame qezençkerdene, şerwananê YPG û YPJyî verê xo dabî Girê Spî û ewja zî destê çeteyan ra girewt. DAÎŞ reya verêne bî ke bajarêkê destê xo vînî kerd û Tirkîya zî rayîranê tewr muhîman ra yewe vînî kerd. O wext medyaya hetgirî vatişanê sey ‘PYD DAÎŞ ra tehlukeyêr o’, ‘Başûrê ma de tehlukeyêko gird esto’ û sewbîna eştbî û dima ra hêrişî dest pêkerdbî.

Çeteyê ke Qetlîyamê Kobanê de ca girewtî, ser Tirkîya ra derbasê bajarê Kobanê bîbî û no zî nîşan dayêne ke qetlîyam de rolê kamî çî yo. Bi nameyê Osman Ehmedî de keso ke keyeyê xo ra 4 kesî vînî kerdî, qala ê rojan kerde. Ehmedî dîyar kerd ke çeteyan Kobanê ra dima Girê Spî de zî derbê girdî werdî û va ‘Seba ke çeteyan hezim nêkerd, hewl da heyfê xo sîvîlan ra bigîrî’.

Seba erd û welatê xo şehîd kewtî

Ehmed wexto ke qala qetlîyamî keno, çimê ey pirr benî û wina vano: “Serkewtişê Kobanê ra dima şar agêra keyeyê xo û cuya xo domna. O wext çeteyan hêrişê şarî kerd û qetlîyam viraşt. Hêrişî ver bi seyan merdimî ameyî qetilkerdene. Qetlîyam de 2 birayê mi, dayîka mi û veyveka ma ameyî qetilkerdene. O wext ra nata banê ma veng o. Ma seba azadîya xo bedelê girdî dayî. Seba erd û welatê xo şehîd kewtî. Eke ewro tayê rîyê ma huyeno, no saya şehîdan de yo. Çimkî înan canê xo seba ma feda kerd.”

Rûmetê merdimî yo

Ehmedî va ‘ma her çiqas ke raştê qetlîyaman ameyî zî, ma erdê xo nêterikna’ û wina dewam kerd: “Ê ameyî û şîyî, labelê ma bi seserran o ke nê erdan ser o yî. Dejê her serkewtişî estî.”  Osman Ehmed eynî wextî de wexto ke DAÎŞ 15ê Êlula 2014î de hêrişê Kobanê kerd, kar û keyeyê xo yê Beyrûtî ca verdano û mîyanê 24 seatan de şono Kobanê û beşdarê xoverdayîşê tarîxî beno. Reyna Ehmed wexto ke DAÎŞ 29ê Teşrîna peyêna 2014î de seba girewtişê Berê Murşîtpinarî hêriş keno, tewr vernî de xover dano. Ehmed nika zî Kobanê de dikanêko şenik akerdo û ewja ra ewnîyeno. Osman tewr peynî wina vano: “Welatê merdimî namus o, bajarê merdimî namûs û rûmetê merdimî yo. Kamcîn wext pawitişê erd û welatî kewto milê ma, ma hertim amade yî.”