Seba weşî û ewleyîya Rayberê Şarê Kurd Abdullah Ocalanî bajarê Strasbourgî yê Fransa de vernîya Konseyê Ewropa û CPTyî de çalakîye dîyaybî destpêkerdiş. Çalakîye bi beşdarbîyayîşan dewam kena. 

Babete ser o Dîvanê Serekîye yê KCDK-Eye îzehetêk da. KCDK-Eye îzehetê xo de dîyar kerd ke çalakîya ke Strasbourgî de dîyaya destpêkerdiş, bi beşdarbîyayîşan bi hawayo hîra dewam kena û îzehet wina dewam kerdo: “Ma kurdî û dostê kurdan ma cuya Rayber Abdullah Ocalanî sey cuya azade ya xo vînenî. Cok ra wa herkes bizano heta ke ma netîce bigîrî, ma do Strasbourg de bibî.”

KCDK-Eye dewamê îzehetê xo de bale anto berpirsîyarîya dewletanê Ewropa, dezgehanê fermî yê Ewropa ser û wina ameyo vatiş: “Na rewşe ra hem dezgeyê fermî û hem zî dewletî berpirsîyar î. Ma bi hawayo baş zanî ke ancax eke netîce bêro girewtiş, etirîyayîşî orte ra wedarîyenî. 2 serrî yo ke ma Rayber Abdullah Ocalanî ra ti xebere nêgênî û CPT zî no het de bêveng o. No zî nîşan dano ke no problemêkê mîyanê dewletan de yo. CPT vatbî ‘ma dewleta tirkî reyde têkilîye mîyan de yî, la ma nêşênî çîyêk vajî’. Na raştîya xo de vindetişê Konseyê Ewropa û dewletanê Ewropa nîşan dano. Helbuk ganî şexsîyet, cins û etnîsîteya keso ke raştê îşkenceyî yeno ra nêro ewnîyayîş. No wezîfeyê CPT yo.” 


Vera dezgehan de reaksîyonî estî

KCDK-Eye îzehetê xo de wina vato: “Ma bi çalakîya roniştişî ke 23ê teşrîna verêne ra nata dewam kena reyde hewl danî nê tecrîdî bişiknî û CPTyî dawetê wezîfe û berpirsîyarîya ci bikerî. Kurdî vera Ewropa, Konseyê Ewropa, Parlamentoya Ewropa û CPTyî de bi reaksîyon î. Cok ra her cayê Ewropa de heqanê xo pawenî û wazenî netîce bigîrî. Labelê bêvengîya Ewropa ameya dûştêko winasî ke kurdî do zirar bidî bedenê xo. 6ê teşrîna peyêna 2017î de bi nameyê Welîd’ê Defî de yew kurdo welatperwer bi vatişê ‘CPT koleyê Erdoganî yo, çira şima nêşonî Îmrali, CPT eşkeno çareser bikero’ waşt xo vernîya CPTyî biveşno. Ganî dezgehê Ewropa nêyî bivînî.”


Wa herkes beşdarê mîtînge bibo

KCDK-Eye îzehetê xo de qala mîtînga ke do 12ê teşrîna peyêne de bêro viraştiş zî kerde û wina va: “Wa kurd û dostê ma beşdarê çalakîya ke Strasbourgî de dîyaya destpêkerdiş bibî. Ma do 12ê teşrîna peyêne de vernîya CPTyî de mîtîngêk bivirazî. Aye roje do Otobusa Abdullah Ocalanî zî ewja de biba. Cok ra ganî ma bi hawayo xurt beşdarê mîtînge bibî û wezîfe û berpirsîyarîya CPTyî bidî vîrê ci.”  


STRASBOURG