Vervatoxa Kongreya Starî ya Şêx Meqsûdî Fatma Hesane va ‘ganî cinîyî zihnîyetê serdestî yê camêrdî û dewletan ra çîyêk nêpawê’ û wina dewam kerde: “Ma xo û xoverdayîşê xo ra hêz bigêrê û cinî bikerê xurte. Ma pîya eşkenê cewabêkê rastî bidê nê prosesî.”
AXÎN TOLHILDAN / ANF / QAMIŞLO
Eşrefîye û Şêx Meqsûd taxê Helebî yê ke seba rastîya şarî ya şorişgêre sey nimûne yenê ramotene. Şarî nê mehlayan de fek ca û wareyê xo ra vera nêda, xover da û netîce de bi ser kewt.
Vervatoxa Kongreya Starî ya Heleb-Şêx Meqsûdî Fatma Hesane ya ke hewteyê ravêrteyî de tewrê kongreya awankerdişê Meclîsê Cinîyanê Vakur û Rojhelatê Sûrîye bîye, derheqê muhtewaya kongre de qisey kerde.
Fatma Hesane qiseykerdişê xo de va ‘Ma omid kenê ke Meclîso ke ameyo awankerdene do têgêrayîşê cinîyanê Sûrîye, Rojhelatê Mîyanêne û dinya de vila bikero’ û wina domnaye: “Ma hêvî kenî ke omid û projeyê Rayber Apoyî bica bîyaro. Ma do bêmabên xover bidê, hêzê dewlete û zihnîyetê serdest ê camêrdî ra çîyêk nêpawê. Ma xo û xoverdayîşê xo ra hêz bigêrê. Ma pîya eşkenê cewabêkê rastî bidê nê prosesî.”
Hesane dewamê qiseykerdişê xo de qala xoverdayîşê Helebî kerd û wina dewam kerde: “Xoverdayîşê Şêx Meqsûdî nizdîyê 5 serran dewam kerd. Bi hêzo ke cinîyan, camêrdan, domanan, kokiman yanî her kesan Rayber Apoyî ra girewto, xoverdayîş ame nîşandayene û nêame verdayene ke çeteyî dekewê Taxa Şêx Meqsûdî. Rayber Apo zî xeylî reyan ame bajarê Helebî, perwerde da, mi bi xo zî Rayber Apo dî, hêzêko pîl ê ra girewt. Ma bi nê hêzî Şêx Meqsûd azad kerd.”
Hesane qiseykerdişê xo de va ‘Şêx Meqsûd cayêko stratejîk o’ û wina domnaye: “Eke ma Şêx Meqsûdî ra fek vera bidayêne do Heleb bi temamî dest ra bişîyêne. Şarê ma Şêx Meqsûd de karê rindî kerdî. Mesela rojnameyê Ronahî ewil tîya de me vetene û kovara ma zî weşan bî. Reyna cilê grûba ma ya muzîkî tîya de ameyêne deştene. Xeylê ciwananê ma tîya ra beşdar bîyî û şehîd bîyî. Ma o wext şerwanan rê werd viraştêne, birîndaran tedawî kerdêne û seba înan tayê çîyan peyda kerdêne.”
Ma hetêk ra şer kerd, hetêna ra zî perwerde dî
Hesane peynîya qiseykerdişê xo de qala xoverdayîşê Şêx Meqsûdî kerde û wina qedênaye: “Netîce de ez vana ke ma bi mengan, serran xover da û ma bi ser kewtî. Serkewtişê ma her kesî rê bi nimûne. Rayber Apoyî bi xo zî qala nê xoverdayîşî kerdo û sey şarêko şorişgêr bi name kerdo. Şêx Meqsûd de şar û hêzê ma yê leşkerîyî bîyî yew û ma bi ser kewtî. Ma hetêk ra şer kerd, hetêna ra zî perwerde dî. Ma bi zor û zehmetîyan sey keyeyêk pîya xover da, her kesî karê xo kerd û no keye bi rastî zî netîce de bi ser kewt.”