Hemserekîya Konseyê Caardişî yê KCKyî derheqê weşî û ewleyîya Rayberê Şarê Kurdî Abdullah Ocalanî de îzehetêkî daye û hukmatê AKP hişyar kerde.
KCKyî îzehetê xo de vato ‘Ma îqtîdarê AKPyî hişyar kenî’ û îzehet wina dewam kerdo: “Eke derheqê ewleyî û weşîya Rayber Apoyî de çîyêko negatîf bibo, berpirsîyar hukmatê AKP û Erdogan o.”
KCKyî îzehetê xo de dîyar kerdo ke tayê xeberê ke çimeyê înan nînî zanayîş, derheqê ewleyî û weşîya Ocalanî de melumatê nakokinî danî û îzehet wina domîyayo: “Herkes derheqê ewleyî û cuya Rayberîye de hesasîyetê ma zano. Cok ra ganî zelal bibo ke nê xeberî raşt nîyî. Serdozgerîya Komare ya Bursaye îzehetêkî daye û va 'rewşêka winasî çin a' û derbaz bîye. No nîno qebulkerdiş. Heqê esasî yê keye, avûkat û rayapêroyî esto ke derheqê Rayber Apoyî de melumat bigîro. No semed ra ganî bi hawayo lez Rayber Apo bi avûkat û keyeyê xo reyde pêvînayîş bikero. Mumkin nîyo ke şarê ma û rayapêroyî bawerîya xo îzehetê Serdozgerîya Komare ya Bursa bîyarî. Rayberîye 6 serrî yo ke bi mehneyê 'keştîye xirabe ya, rewşa hewa baş nîya' nêşêno pêvînayîş bikero; cok ra merdim nêşêno bawerîya xo dozgerî bîyaro”
Ganî şar bidekewo têgêrayîşî mîyan
KCKyî îzehetê xo de vato 'seba zelalkerdişê ewleyî û weşîya Rayberîye' ganî rayapêroyî bikewo têgêrayîşî mîyan' û wina domîyayo: "Ganî şarê ma û hêzê demokratîkî heme cayan de bikewo têgêrayîşî mîyan. Ancî lazim o hukmat şert û mercê keye û heyetêkê meclîsî bi hawayo lez Rayber Apoyî reyde pêvînayîş bikerî awan bikero. Cok ra ma sere de CPT û heme dezgehê ke ewleyî û weşîya Rayber Apoyî ra berpirsîyar î rê veng danî, wa herkes no het de çi bikewo milê ci ser, bikero.”
Berpirsîyar Erdogan û hukmatê AKP yo
KCKyî peynîya îzehetê xo de hukmatê AKPyî hişyar kerd û veng da şarî û îzehet wina qedîyayo: "Ma îqtîdarê AKPyî hişyar kenî; eke derheqê weşî û ewleyîya Rayber Apoyî de çîyêko negatîf biqewimîyo, berpirsîyarê ci Erdogan û hukmatê AKP yo. Ganî şarê ma û rayapêroyî bawerîya xo bi ti îzehetê AKPyî rê nêarî û heta ke pêvînayîşî bêrî kerdiş û Rayberîye ra xebere bêro girewtiş, çalakîyanê xo bidomnî."