TOLÎN HESEN / ANHA / HELEB
Roşinvîranê Rojawanê Kurdîstanî derheqê mektûba Rayberê Şarê Kurdî Abdullah Ocalanî ke tarîx ra heta ziwan, kultur û çareserîya problemanê krîzê Sûrîye xeylê çîyan xo mîyan de hewênena ser o qisey kerdî.
Nuştox Ehmed Reşoyî va ‘mesajê Ocalanî de ca dîyayo pawitişê kulturê şarêkî û wina domna: “Mesaj de bale ancîyaya rewşa Êzidîyan ser. Êzidîyî wayîrê tarîxêkê kehenî yî. Rayber Ocalan bi vatiş û mesajê xo bale anto biratîye ser û no vatiş waştişê ma yo zî. Eke ma kulturê xo bipawî, o wext ma eşkenî biresî çareserîye zî.”
Nuştox Mihemed Elî Hêderî zî va ‘ganî mesajê Ocalanî yê derheqê kulturê şaran de raşt bêrî famkerdene’ û wina domnayo: “Ocalanî vato ganî ma ziwanê xo qisey bikerî, çimkî ziwan seba estena şarêkî nêbo nêbeno yo. Kurdî wayîrê kulturo ke heme kulturanê bînan xo mîyan de hewêneno yî. Eke ma kulturê xo bipawî, o wext ma eşkenî estena xo zî bipawî. Tersê ci qirkerdişê kulturî yo. Vatişê Ocalanî seba şaran perspektîf o û ganî ma baş fam bikerî.”
Mektûbe zaf muhîm a
Endamê Meclîsê Sûrîyeya Demokratîke (MSD) Bedran Hemoyî zî dîyar kerd ke çareserîya qanûno bingeyî ya Ocalanî seba rizgarîye tena rayîrêk o û wina va: “Ganî qanûno bingeyî ke heme heqanê dormepawitoxan mîyanê xo de hewêneno bêro ronayene. Eke wina bibo, ma eşkenî welatê xo parçebîyayîş ra bixelisnî. Coka mektûba Ocalanî zaf muhîm a. Çimkî Ocalan mektûbe de qala Neteweya Demokratîke kerde û ganî ma na pratîze bikerî.”