Vîrusê Koronayî her ke şono tehlukeyê xo pêroyina Dinya ser o pîl keno. Coka demêko yo Îdarekarîyê Xoser ê Vakur û Rojhelatê Sûrîye qerarê qedexekerdişê teberî da. Herêma Şehba ya ke ablûqa kerdê, şar xeylêk astengîyan anceno. Hetêk de vîrus û heto bîn ra hêrişê dewleta tirkî û komê girêdayê aye dewam kenê û şar zî vera înan xo ver dano. Cinîyê herêma Efrînî yê ke kampa Berxwedanî ya Kantonê Şehbayî de bi ca bîyê na babete ser o ajansê ma rê ercnayî. ‘Ganî şarê ma pawitişê xo û komelê xo bikero’ Goreyê xebera jinnewsî, Îdarekara kampa Berxwedanî Nesrîn Şeiboye serê tedbîr û têgeyrayîşê kampe de şîrove kerde û wina vat: “Bi demêko yo Vîrusê Koronayî temamê dinya rê vila bîyo û bi hezaran kesî merdê. Heta nika zî tu derman ci rê nêameyo vînayene. Ma seke îdarekarê kampa Berxwedanî, vera Vîrusê Korona de xeylêk tedbîr ma girewtê û hîrê rojan ra reyke bi hawayêko rûtin heme bajar û kamp yenê dezefektekerdene. Her çiqas îmkanê ma kêm bê zî çi destê ma ra bêro ma kenê. Eynî wextî de Heyva Sorî ya Kurdî despêkê kampe de kesê ke derbazê kampe benê, bi cihaz germbîyayîşê heme kesan kontrol kena û wina derbazê kampe kena. Wa wazenê ke şarê ma vera vîrusî pawitişê xo û komelê xo bikerê.” Cinîya bi nameyê Hacer Silêmane zî bale ante serê hêrişê dewleta tirkî û wina vat: “Ma goreyê qerarê ke Îdarekarîyê Xoser dayê têgeyrenê. La gerek pêro kesî vernê de xo ra destpê bikero. Çend rojî verê dewleta tirke û çeteyê ci reyna bi topan hêrişê ma kerdî. Netîce de doman û sivîlî birîndar bî. Heme dinya seba Vîrusê Korona mîyanê lebate de ya, la dewleta tirkî zî her roje hêrişê xo serê ma de dewam kena. Ma nêzanê xo Vîrûsê Korona ra bipawê, yan zî hêrişê dewleta tirke û çeteyanê ci! Ganî sazgehê heqê merdiman çimê xo vera hêrişê dewleta tirke abikerê û rayîr vernîya hêrişan bigîrê. Ma tena herra xo wazenê û bîyayîşê ma yê Şehbayî serê esasê ageyrayîşê Efrînî yo.” MERKEZÊ XEBERAN