Sereka Şûbeya Sariyerî ya Komeleya Pîr Sultan Abdalî Zeynep Yildirime 27ê temmuze de ameye tewqîf kerdene. Yildirime bitaybetî cemxaneyê Armutlu ser o mijul bîyêne û verê cû derheqê viraştişê nê cemxaneyî ser o wina vatbîye: “Ma 3 serrî û nîme yo ke nê cemxaneyî virazenî. Verê cû seba ke ca nêdaybî ma, ma bi hawayo demkî viraştbî. No cemxane de do heme çî bibo.”
Vera tewqîfbîyayîşê Yildirime de cinîya bi nameyê Kezban Bektaşa 90 serreyî reaksîyon nîşan daye. Bektaşe na çarçewa de bexçeyê Cemxaneyî de çalakîya roniştişî daye dest pêkerdene. Bektaşe dîyar kerde ke heta ke kênaya aye yena veradayene, aye do çalakîya xo bidomno.
Bektaşe va ‘kênaya mi serra 1988î de ameye na taxe’ û wina domnaye: “O wext ra nata ma pîya yî. Zeynepe hertim seba elewî û na taxe têkoşîn dayêne. Ma elewîbîyayîş suc o? Ameyî kênaya mi berdî. Çira ez nêzana. Pawitişê cemxaneyî suc o? Eke wina bo, o wext ez zî sucdar a. Ez herkesî seba ke destek bidî, dawet kena. Ez wazena wa kênaya mi serbest bêro veradayene. Wexto ke Zeynepe tewqîf bîye, cemxane nîmcet mend. Zextî zaf î.”
JINNEWS / STENBOL