Çalakîyê grevê vêşanîye ke seba wedarnîyayîşê tecrîdî ameyî destpêkerdene, bêmabên dewam kenî. Dayîkê hepsîyê ke grevê vêşanîye de yî, vatişanê hepsîyan neql kerdî û waştî ke wa tecrîd bêro wedarnayene. Dayîkî vanî seba aştîye ganî tecrîd wedarîyo.

Hemsereka Kongreya Komelê Demokratîke (KCD) û Parlamentera HDPyî ya Colemêrgî Leyla Guvene seba ke tecrîd bêro wedarnayene, grevê vêşanîye daybî destpêkerdene û çalakîya Guvene roja 168. de dewam kena.

Reyna Başûrê Kurdîstanî de çalakîya Nasir Yagizî roja 155. de, Strasbourg de çalakîya 14 kesan û Galler de çalakîya Îmam Şîşî roja 129. de, zîndanan de çalakîya hepsîyan roja 130. de, Mexmûr de çalakîya Fadîle Toke roja 95. de, Kanada de çalakîya Yusuf Îbayî roja 103. de bêmabên dewam kena.

Parlamentera HDPyî Dersîm Dage 3ê Adare de, Tayyîp Temel û Murat Sarisaç zî 8ê Adare de dest bi grevê vêşanîye kerdbî û çalakîya parlamenteran awanîya HDPyî de bêmabên dewam kena. Babete ser o dayîka hepsîyo bi nameyê Ahmet Bayna ke 55 rojî yo ke grev de yo, Safîye Bayna qisey kerde.

Heta ke tecrîd nêwedarîyo, ma do bidomnî

Bayna dîyar kerde ke aye lajê xo reyde 17ê Nîsane de qisey kerdo û lajê aye wina vato: “Ma 1ê Adare ra nata grev de yî. Moralê ma baş o û ma qerardar î. Rewşa embazê ke grûba sifteyîne de ca gênî, tay xirab o. Vîtamînî nêdîyênî înan. Ma ser o zextê pîlî estî. Labelê heta ke tecrîd nêwedarîyo ma fek çalakîya xo ra veranêdanî. Ma pey Rayberîya xo de yî. Bêveng memanê, seba ma veng bivejê.”

Ganî tecrîd biqedîyo

Dayîke Bayna daye zanayene ke seba ke hepsîyî grev de yî, ê zî nêşênî çîyêk biwerî û rakewî û wina va: “Ez zî wayîrê çalakîya lajê xo vejîyena û heta dalpeya peynîye ya gonîya xo do têkoşîn bida. Seba ke aştîye bêro no welat, ganî tecrîd bêro wedarnayene. Gere waştişê hepsîyan bêro qebulkerdene û fek polîtîkaya tecrîdî ra bêro veradayane.”

‘Ez canê xo Rayberîye rê feda kena’

   

Dayîka hepsî Mazlûm Tekeyî Nezahat Tekeye zî qala xoverdayîş û destekdayîşê çalakîyanê grevê vêşanîye kerdî. Nezahat Teke eynî wext de dayîka temsîlkara Kovara Ozgur Halkî ya bajarê Amedî Nesrîn Tekeya ke 2000 de xo veşnaybî ya. Dayîke Teke wina va: “Waştişê domananê ma biheq ê. Heme zîndanan de tecrîd û zextî estî. La tecrîdê Îmrali her roje hîna xorî beno. Eke tecrîdê Îmrali biqêdîyo heme zîndanan de zî rewşe bena normal. Seke xebera Mazlûmî ameye, kênaya mi Nesrîne ameye vîrê mi, zerrîya mi recifyaye. Ez nêwazena yewna domanê xo vînî bikerî. Kêynaya mi Nesrîne çalakî ra dima gama ke nêweşxane de bî, va, ‘Yew ganê mi esto ey zî ez Rayberîya xo rê feda kena‘ aşmêk dima ra zî şehîd kewte. Ez dejê zerrîye zana, wa dayîkê binî meancê.”

Se beno wa bibo ma qerardar ê

Dayîke Teke ard ziwan ke aye çend rojî verê lajê xo zîyaret kerd û derheqê xoverdayoxan de nê vatî: “Lajê mi û embazê ey zehîf bîyî. Ê çend vajî ma hol ê zî ma dayîkî vînenê û hîs kenê ke halê înan zaf xirab o. Wexto ke lajê mi qisey kerdêne destê ey recifyayêne. Naye mi ser o zaf tesîr kerd. Her pêvînayîş de lajê mi vano, ‘Waştişê ma wedartişê tecrîdî yo. Eke ma wirzê lingan ser do tecrîd bêro qedînayene. Se beno wa bibo ma qerardar ê.‘ Wezîrîya Edeletî ganî goreyê qanûnî têbigêro û tecrîdî wedarno. Wa her kes vengê xo vejo ke kes nêmiro. Wa tecrîd wedarîyo. Eke tecrîd wedarîyo aştî û huzûr yenê na herre. Eke tecrîd xorî bibo kaos û şer hîna gird beno. 7 ganan semedê Rayber Apoyî xo feda kerd. Wa her kes wirzo lingan ser ke hinî kes nêmiro. Hende bêvengîye bes a. Ma pêro pîya bibê vengê tepişteyan.”

 

AMED