“Nurîye Gulmen û Semîh Ozakça” Ez bawer kena ke nê di nameyî hetî her kesî ra yeno zanayîş. Nurîye Gulmen yew akademîsyen a, Semîh Ozakça zî yew mamoste yo. Nê di embazan badê 15 temuze bi qerernameya OHALî gureyanê xo ra îxraç bî. Semedo na nêheqî ser zî mîyanê Anqara de destpê çalakî kerdî. Her roje vernîye anitê heqê merdiman de 6 seet roniştênê, gureyanê xo waştêne û bade îzehatê çapemenîye, protestoyê xo kerdênê û şîyênê keyeyanê xo. Rojê verênan de polîsanê Anqara nê çalakgeran ra mudaxele nêkerdênê. Labelê çalakîya di mamosteyan roje bi roje hîna zaf bi gird. Her ca ra merdimî ameyênê verê nê çalakgeran û past dayêne înan. Her roje kome merdiman wexte çalakî de ameyênê pêser waştênê xo vatênê pero pîya sloganan eştênê û dewlete protesto kêrdenê. Çalakîya nê mamostayan her cayanê Tirkîya de bîye vila. Zafîyer bajaran de êy ke hetê dewlete ra îxraç bîbî, sey çalakger Anqara bajarê xo de destpê çalakîyan kerd. Her cayanê Tirkîya de vengê xoverdayîşî ameyêne. Çi wexto ke çalakî bi gird, bi vila û veng da heme cayan, dewleta Tirkîya nê rewşan ra tersa û talîmatê xo da polîsan û polîsan her cayan de hem çalakgeran ra hem zî komanê merdiman ra mudaxale kerd. Her roje hem çalakgerî hem zî merdimanê bînan bi zorî girewtênê nezaretxane û badê çend saete ra pey zî nezaretxane ra caverdayênê. Labelê nê mudexelan ser çalakgeran ser de tesîr nêkerd. Roje bi roje venganê xo hîna zaf kerdî berz û dormaleyê înan de hîna zaf merdîmî kom bîyî.
Çalakgerî deklarê kerdbî ke heta waştêna ma nêro ca, ma na çalakîya xo canêverdanî û ma destpê grevê veyşanî kenî. Badê 100 rojan zî çalakgerî izahetê grevê veyşanî kerd û di mamosteyan 11 adare de destpê grevê veyşanî kerd. No qerar ra pey çalakîya mamostayan hîna zaf veng da û her cayanê dînya de bi eşkera. Roje bi roje nê momasteyan vernîya çimanê merdiman de helîyayî. Bi xoverdayîşê grevê veyşanîye di çalakgerî resa roja 75. Weşîya înan roje bi roje bî xirabin.Verba xoverdayîşê grevê veyşanî dewlete nê mamostayan eşt nezaretxane û badê mehkeme zî bi sucê endamîya rêxistine DHKP-C erşawite hepîsxane. Nîka nê mamostayan Hepisxaneyê Sîncanî de yî û çalakîya veyşanîya xo dewam kenî. Dewlet dormeleya anitê heqê merdiman qefelna û qedexe kerd.
Dewlete Tirkîya sey her wextî xoverdayîşê merdiman pey zordarîya xo qedêna. Labelê çalakî û xoverdayişê nê mamostayan rîya zordarîya dewleta Tirkîya reyna hemê dînya de eşkera kerd. Çalakîya mamosteyan ser her kesî de tesîr viraşt. Çunke înan verba faşizmî û verba nêheqîyêk de bêters vindertî. Cesaretê mamostayan bî yew rayberî. Ez bawer kena ke xoverdayîşê mamosteyan pelanê tarîxî yê çalakî de cayêko muhîm girewto.