Namzed û xebatkarê Partîya Demokratîke ya Şaran (HDP) bajar bi bajar, dewe bi dewe û ber bi ber gêrenî şarî ra destek wazenî. Namzedî Çewlîg, Meletî, Amed, Sêrt û xeylê cayanê bînan de xebatê weçînayîşî bîyî û raştê eleqeyêko girdî ameyî. Namzedan ra Musa Farisogullariyî wina va: “Şar azadîya Ocalanî wazeno. Ma do seba qerarê şarê xo têkoşîn bidî.” Weçînayîşê 24ê Hezîrane rê 15 rojî mendî û partîyî hewl danî xo biresnî heme cayan. Çarçewaya amadekarîya weçînayîşî de Partîya Şaran ya Demokratîke (HDP) Kurdistan, Tirkîya û Ewropa de xebatanê xo domnena. 
Namzed û îdarekarê HDPyî bajar bi bajar, dewe bi dewe û ber bi ber gêrenî û şarî ra destek wazenî. Namzedî bajarê Çewlîg, Meletî, Amed, Sêrt û sewbîna xeylê cayan de şarî reyde ameyî têhet û şar eleqeyêko gird nîşanê namzedan da. ÇEWLÎG
 Rêxistina HDPyî ya qezaya Dara Hênî ya Çewlîgî, merkezê qeza de werdê fitarî organîze kerde. Namzedî Erdal Aydemîr, Nîhat Aksoy, Şefîka Dogane û xeylê welatîyî beşdarê werdî bîyî. Tîya de namzedî qisey kerdî û dîyar kerdî ke 24ê Hezîrane seba xeylê kesan sey mîladî yo û ganî şarê Çewlîgî berpirsîyarî bigîro milê xo ser. Şar eleqeyêko gird nîşanê namzedan da. 
Heto bîn ra Çewlîg de 10ê Hezîrane de amadekarîya viraştişê mîtîngêk yena kerdiş. Mîtînga Çewlîgî do bi siloganê ‘Ma vanî êdî bes o’ bêro viraştiş û Hemsereka Pêroyî ya HDPyî Pervîn Buldane beşdarê mîtînge bibo. Mîtînge do çatrayîrê PTTyî de bêro viraştiş û Rêxistina Bajarî ya Çewlîgî veng daye herkesî ke wa beşdarê mîtînge bibî. AMED
 Merkez û qezayê Amedî de zî xebatê weçînayîşî dewam kenî. Tevgerê Cinîyanê Azadan (TJA) Sûr, Yenîşehîr û Peyas de sifreyê rîyê erdî organîze kerdî. Namzedî Remzîye Tosune, Dersim Dage û Semra Guzele û sewbîna cinîyî beşdar bîyî. Cinîyan werd ra dima vilawekî vila kerdî. Qezaya Pasûrî de keyeyî ameyî zîyaretkerdiş û namzed Abdurrahîm Durmuş beşdarê zîyaretan bi. Namzedî Îmam Taşçier û Musa Farisogullari qezaya Bismilî de beşdarê werdê fitarî bîyî. Namzedan ra Ferda Fahrîogluye zî qezaya Erganî de beşdarê kombîyayîşê şarî û akerdişê buroyê weçînayîşî bîyî.
Namzedan ra Farisogullariye tîya de qisey kerd û wina va: “Ma xebatan de vînenî ke qerarê şarî zelal o. Wexto ke vera kurdan de qerarê şerî ame girewtiş, tecrîdo ke Rayberê Şarê Kurdî Abdullah Ocalanî ser o esto, giran kerdî. Şarê ma wedarnayîşê tecrîdî nê, azadîya Ocalanî wazeno. Ma do seba qerardarîya şarê xo têkoşîn bidî.” SÊRT
 Namzedê HDPyî yê bajarê Sêrtî ‘yew ray zî yew ray a’ dewe bi dewe gêrenî û keyeyan zîyaret kenî. Bitaybetî dewê Kelendera, Kelehok, Gereuşe, Keyeyê Mervan Gulî, Derxalip, Dodoîs, Lefe, Gundê Şex, Nivila, Xerte, Sedax, Helîla, Terham, Merxe, Şidada û Tirimî ke serranê 90î de ameybî vengkerdiş, ameyî zîyaretkerdiş. Namzedî raştê eleqeyêko gird ameyî. Namzedan ra Siddik Taşî taxa Congbayirî de qisey kerd. Taşî bale ant ewleyîya sindoqan ser û va ‘ma do 24ê Hezîrane de nê îqtîdarî biqedênî.” MELETÎ 
 Hemserekê Pêroyî yê HDPyî Sezaî Temellî Meletî de beşdarê xebatanê weçînayîşî bi. Temellî raştê eleqeyêko gird yê şarî ame. Temellî bi konvoyî tura bajarî eşt û dima ra derbazê Xarpêtî bi. Namzedê HDPyî keye û esnafan zîyaret kerdî. Namzedan ra Yusuf Bozkuşî va ‘heme hetê komelî HDP sey hêvîye vînenî’ û wina domna: “Herkes zano ke temînatê demokrasî HDP yo. Tena ma wazenî wa ciwanî hîna zaf beşdarê xebatan bibî.” n MERKEZÊ XEBERAN