Hanim Yavuzel ke nameyê domanê ci Mehmet Yavuzel ke endamê Meclîsê Partîya DBPe yo mîyanê cêrzemînê yewin de vîyartênê û seba ke domanê xo bigîra bi rojan nobed tepişt û bi qîrayîş û serewedaritişê xo bî dayîka bi cesaret a xoverdayîşî. Dayîka Hanim ke seba domanan bigîra bi rojan Nisêbîn de nobed tepişt, nika zî seba ke cenazeyê domanê xo bigîra morg bi morg gêrena.
Dayîka Hanim Yavuzel qetlîyam ser o qalî kerd û dîyar kerd ê ke qetlîyam vera bêveng mendî zî wertaxê qetlîyamî yî û wina verdewam kerd: “Seba domananê ma serê ma tîk o la dijî domananê ma zilm û qetlîyamêko gird ame viraştiş. Domananê ma ra yew zî nîno naskerdiş. Çimê înan ameyî vetiş, sereyê înan ameyo parçekerdiş û sêneyê înan bi fîşekan ameyî parçekerdiş. Ez yew bi yew nêweşxaneyan gêraya û min heme cenazeyî dîyî. Rewşa cenazeyan çimanê min vera nêşonî.”
Domanê 14 serrî zî estê
Yavuzel dergeyîya qalîkerdişê xo de ciresna ke bêrê qetlîyamêkî senî şarê kurd ser o ameyo kerdiş, biveynê û wina domna: “Laşê ciwan û keynekan ser o wehşetêkî senî ameyo kerdiş, mezgê min nêgêno. Mîyanê cenazeyan de laşê ciwananê 14 serrî zî estî û heme zî laşê înan ameyo parçekerdiş. Cizîr tadayî Kampê Nazî û dormarê Cizîrî bi têlan padayî û nêverdanî çew bidekewo. Wexto ke molozan veng kenî tede heste, sere, dest û polê domananê ma vejyenî. Wa her kes bêro çimanê dayîkê kurdan ra biewnîyî, wa bêrî çimanê Mehmetê min ra biewnîyî. Ez heta ke yew dalpeya gonî ganê min de bibo ez do paştîya şehîd û ciwananê xo de biba.”
Ma Kurdistan awan kerd
Yavuzel ard ziwan ke çekuyî wehşeteko ameyo cuyayîş vera kemî manenî û va: “Ez nêzana vera no wehşetî se vaja. Topê ke domananê ma gunenê werekna wa min bigunaynê û wa înan bivatênê ke ‘dayîkê ma yenî qetilkerdiş’. Ma hende vengê her kesî kerd la vendayîşê ma nêresa çewî. Ez bawer kena ke ê ke nê dejî bi ma dayî cuyayîş, ê zî bicuyî. Wa serê şarê kurdî weş bibo. Ma Kurdistanê xo awan kerd, wa çew nêvajo ke ma awan nêkerdo. Ma qezenc kerd, înan vînî kerd û bin de mendî“.
Handan TUFAN / JINHA