Hemsereka Federasyonê Demokratîke ya Vakurê Sûrîye Hedîye Yusufe derheqê pêvînayîşê ke do Astana de bêrî kerdiş de qisey kerde.
Hedîye Yusufe va ‘ma verê cû projeya federasyonî îlan kerdbî û na zî parçeyê çareserî ya’ û qisekerdişê xo wina domnaye: “Ma nê qerarî şarê ke Vakurê Sûrîye de cuyenî, reyde girewt. Teberê ma de zî yê ke hewl danî xo rêxistine bikerî, estî. Nînan heta nika ti çareserî aver nêberdo. Kombîyayîşo ke Astana de bêro kerdiş zî nînan ra yew o.”
Adirbest çareserî nêano
Hedîye Yusufe dewamê qiseykerdişê xo de va ‘Tirkîya, Rûsya, Îran û heme hêzê ke wina hereket kenî, wazenî şert û xeta xo ma ser de bidî qebulkerdiş’ û wina dewam kerde: “Eke wina bibo, kombîyayîşê Astana do sernêkewo. Çimkî hêzê xo şarê herême ra nêgêno, piştîya xo dano hêzê sîlehinan. Hêzê sîlehinî zî Sûrîye rê çareserî nêanî. Tena adirbestêko zeyîf zî problemanê Sûrîye çareser nêkeno. Reyna pêvînayîşî do ser kamcîn esasan ra aver şêrî, dîyar nîyî. Cok ra ma eşkenî vajî ke do kombîyayîş sernêkewo.”
Bê ma sernêkeweno
Hedîye Yusufe peynîya qiseykerdişê xo de wina va: “Ma sey hêzêko esasî nêameyî dawetkerdiş. Eke ma bêrî dawetkerdiş, pêşnîyaza ma seba çareserî dîyar a. Xora dewleta tirk nêwazena ke ma beşdarê kombîyayîşî bibî. Çimkî destê ma de projeyî estî. Hêzê ke do beşdarê kombîyayîşî bibî hîna na babete de pê nêkerdî. Projeyo ke ma tede nêbî, sernêkeweno.”
BERÎTAN SARYA / ANF/ RIMÊLAN