Heto bîn ra Dayîkê Aştîye zî weçînayîşê 24ê Hezîrane ser o qisey kerdî û dîyar kerdî ke ê do rayanê xo seba aştî û edaletî bixebitnê. Dayîkê aştîye dayî zanayîş ke ê do weçînayîşê serekkomarî de zî piştî bidê namzedê HDPyî Selahattîn Demîrtaşî û do hetê çareserîye de tercîhê xo bikerê.
Dayîkê Aştîye ra Medîne Kaymaze va ‘kurdî heqê xo yê tewr esasîyan ra bêpar mendî’ û wina domnaye: "Ciwanê ma zîndanan de yî. Ma keyeyê ma ra vetî. Domanê ma ameyî qetilkerdiş. Her tewir teda serê ma de yenî kerdiş. Ma wazenê kurd û heme şarî wa mîyanê aştîye de bicuyî û cuyêka birûmete bicuyî. No weçînayîş krîtîk o. Ganî herkes raya xo bido Demîrtaş. Televîzyon, rojname û xeylê dezgeyê ma ameyî padayîş. Ez do sey dayîkêka aştîye seba domananê xo, seba destpêkêko newe raya xo bida Demîrtaş."
'Ege de dewijî rewşêka nêbaşe mîyan de yî'
Dayîka Aştîye Perîhan Kortake zî arde ziwan ke şarî vera yewbînan de kerdî dişmen û mehkûmê feqîrî ameyê kerdiş û wina dewam kerde: "Ciwan betal î û kesê ke meclîs de ronîşenê zî çîyêk nêkenî. Weçînayîşan ra ver soz danî, la nêanê ca. Hem Kurdistan de û hem zî Tirkîya de merdimî eciz bîyî. Ege de dewijî gerre kenî. Wazenê yew bivejîyo destê înan ra bitepişo. HDP tena partîya kurdan nê, partîya herkesî ya."
JINNEWS/ÎZMÎR