Serekê Federasyonê Elewîyê Bektaşî (ABF) Muhîttîn Yildizî derheqê referandûmî de qisey kerd û vînayîşê xo ard ziwan. Yildizî va ‘pêşnîyazê bedilnayîşê qanûno bingeyî bi zîhnîyeto tekperest ameyo amadekerdiş’ û qiseykerdişê xo wina domna: “No qanûno bingeyî heq û huqûqê elewîyan nêpaweno. No qanûno bingeyî mabênê 2 partîyan de ameyo amadekerdiş. Mîyanê no qanûno bingeyî de ‘e’ya elewîtî daxî çin a û no qanûno bingeyî elewîtî nêşinasneno. Ganî reng, nasname, ziwan û sewbîna heme çîyê hetê bindestan mîyanê nê qanûno bingeyî de bibîyênê.”
Elewîyî bi tesilî vanî 'Nê'
Yildizî dewamê qiseykerdişê xo de va ‘qanûno bingeyî peymanêka komelkî yo û ganî heme nasnameyan bişinasno’ û wina dewam kerd: “Hem qanûno bingeyî yê 82 û hem zî yê nikayîn elewîyan nêşinasneno. Qanûno bingeyî bi ameyîşê têhet yê huqûqnas, akademîsyen, rêxistinê sîvîlî û sewbîna benî. Eke wina bibîyêne, ma do piştî bidayêne. Wextê Kerbela de Yezîd Hz. Huseyîn rê pere û şan pêşnîyaz keno, labelê Hz. Huseyîn vano ‘ez tîya de mazluman pawena’ û şono Kufe. Labelê seba ke şarê Kufe zulmê Yezîdî dîyo, wayîrê Hz. Huseyînî nêvejîyenî. Her çiqas ke wayîr nêvejîyayî zî qatil Yezîd o. Eke no referandûm de ‘ya’ bivejîyo, do reyna eynî zîhnîyetî bivejyî raste. Ma seba komarêka demokratîke vanî nê.”Yildizî peynîya qiseykerdişê xo de wina va: “Ganî heme dezgehî bêrî têhet û ziqaq û cadeyan de şarî rê qala ‘nê’yî bikerî. Ma do seba ‘nê’yî têkoşînê xo bidomnî.”
DÎHABER / ENQERA