Gerîlaya bi nameyê Binevş Rûbarî ya efrînija ke 24 serrî gerîla de têkoşîn dana, Dêrsim de şehîd bena. Binevş Rûbarî şîyayîşê xo yê Dêrsimî ra ver vato ‘ez heme çîyî rê amade ya’ û wina dewam kerda: “Ez do bi şîyayîşê xo moral û hêz bida şarê xo. Madem ma wayîrê şarêko winasî yî, o wext ma seba nê şarî canê xo zî bidî tay o û ma seba nê şarî çi bikerî zî kêm maneno.”

DILPAK DAG / ANF / BEHDÎNAN

Mîyanê Tevgerê Azadîya Kurdan de xeylê şexsîyetê ke bi têkoşîn û xoverdayîşê xo mora xo dayî tarîxî ro estî. Têkoşînê 40 serran de bi hezaran şehîdî ameyî dayene û heme şehîdan pey xo de mîrasêk verdayo. Nînan ra yewe zî Binevş Rûbarî (Samîye Oso) ya.

Gerîlaya bi nameyê Binevş Rûbarî 1979 de Heleb de yena dinya û hîna emro teze de serra 1992 de beşdarê PKKyî bena. 2 serrî ra pey ver bi Koyanê Kurdîstanî şona û dore reyde wareyanê Heftenîn, Xinêrê, Xakurkê, Metîna û tewr peynî zî Dêrsim de wezîfe kena.

Binevş Rûbarî tewr peynî Dêrsim de manena û 4ê Temmuze de wexto ke seba çalakîye şona qereqolêk ser de şehîd bena. Binevş Rûbarî şîyayîşê xo yo Dêrsim ra ver, qisey kena û qala pratîkê xo yê 12 serran ê gerîlatîye kena. Binevş Rûbarî vana ‘raşta zî prosesê zaf zehmetin bîy û seba rêxistine serrê tarîxî bîy’ û wina dewam kena: “Hetê averşîyayîşan de zehmetîyî zî estbîy. Ez mîyanê prosesanê tewr zehmetinan de menda. Senî derbas bîyî mi fam nêkerd. Hem zaf kûr bi û hem zî mîyanê xo de xeylê averşîyayîş û bedilîyayîşî ameyî cuyayene.”

Mi serranê vîyarte ra tecrubeyê girdî vetî

Binevş Rûbarî wexto ke 2006 de şona Dêrsim hîsanê xo ana ziwan û dîyar kena ke aye zî mîyanê halêko hîsgerî de ya. Binevş Rûbarî dana zanayene ke ‘ez nêzana siba vernîya mi de çi esto’ û wina domnena: “Labelê bawerîya ke mi rêxistine û Rayberîye ra girewta mi de hakim o. Seba gerîla bawerî nêbo nêbeno yo. Ganî merdim verê xo ra bawer bikero. Eke wina bibo, eşkeno bawerî bido dormeyê xo zî. Ez şêra kura zî, ez eşkena beşdarê xebatan biba. Mi serranê vîyarte ra tecrubeyê girdî vetî. Ez heme çîyî rê amade ya. Destpêkerdişê na hemleya ke wisarê 2006î de dîyena destpêkerdene û beşdarbîyayîşê ma şansêko gird o. Prosesêko winasî de rol girewtiş zaf muhîm o. Hêvîya ma esta û ma amadekarîyê xo zî goreyê naye kerdo.”

Çi bikî zî kêm maneno

Binevş Rûbarî peynîya qiseykerdişê xo de wina vana: “Ez do bi şîyayîşê xo moral û hêz bida şarê xo yo ke her roje binê zext û zulmî de yo û ez do înan rê biba cewab. Ez bawer kena ke şarê ma do heta peynî wayîrê ma bivejîyo. Madem ma wayîrê şarêko winasî yî, o wext ma seba nê şarî canê xo zî bidî tay o. Ma seba no şaro ke wayîrê xoverdayîşêko winasî yo rê çi bikerî zî kêm maneno.”