Şerwanê ereb û suryanî yê ke Hemleya Xezebê Firatî de ca gênî, derheqê beşdarbîyayîşê xo yê hemle de vanî ‘ma seba Sûrîyeyêka azade û seba cuyayîşêko ortax şer kenî’ û vengdayî şarê xo ke wa beşdarê hemle bibî
Hemleya Xezebê Firatî 5ê teşrîna verêne de amebî destpêkerdiş û çend rojî verê cu zî merhaleyo dîyine yê hemle dîyabî destpêkerdiş û heta nika xeylê dew, qeza û bajarî destê çeteyanê DAIŞî ra ameyî girewtiş. Şerwanê ke vera çeteyanê DAIŞî de na hemle dayî destpêkerdiş, mîyanê înan de şerwanê suryanî û erebî zî ca gênî.Mîyanê na hemle de şerwanê ereb, kurd, suryanî û tirkmenî ca gênî. Babete ser o şerwanê suryanî û erebî qisey kerdî.
Welateko demokratîk
Şerwanan ra Sîwar Yosufî va ‘Reqa hetê kulturî de bajarêko dewlemend o’ û qiseykerdişê xo wina domna: “Ma seba ke operasyonê bajarêko winasî de ca gênî, sereberz î. Ma zî domanê şarê Sûrîye yî. Na hemle de xeylê şar û bawerîyê cîya-cîyayî ameyî têhet. Ma wazenî zulmê El Nusra, Ehrar El Şam û DAIŞî orte ra wedarnî. Şarê Reqa ke rastê koçbîyîş, talan û qetlîyaman ameyî azad bikerî û rojanê azadan sey xelate bidî înan. Ma do bi Hemleya Xezebê Firatî estena çeteyanê DAIŞî Reqa de biqedênî û Rojhelato Mîyanênî ra reyanê înan bierzî. Ma do welatêko demokratîk awan bikerî.
Şerwananê suryanî ra Zeyd Yahyayî zî va ‘krîzê Surîye bi mudaxaleyê hêzanê teberî hîna zaf têmîyan kewto’ û qiseykerdişê xo wina domna: “Nê semedî ra problemî hîna bîyî kûr. Şar û bawerîyê cîya-cîyayî bin banê Meclîsê Surîyeya Demokratîke (MSD) û Hêzê Sûrîyeya Demokratîke (HSD) de rêxistinîya xo ya leşkerî û sîyasî awan kerdî. Şarê suryanî zî mîyanê HSD û MSD de bi hawayo aktîf ca gênî. Ma ewro sey Meclîsê Leşkerî yê Suryanî mîyanê hemleya azadkerdişê Reqa de ca gênî. Vera kûrbîyayîşê probleman de ganî rêxistinîya HSDyî bêro girdkerdiş. Ma kurd, ereb, tirkmen, çerkes û suryanîyî eynî mewzîyan de ca gênî û ma embazîya mewzîye ronayo. Ma do Sûrîye krîzî ra bixelisnî û welatê xo hetê cuyayîşê neweyî de newe ra awan bikerî.”
MAHÎR YILMAZKAYA / ANF / REQA