Yew hewteyî ra zêde yo ke Dêrsim de daristanî veşenî û heta nika bi hezaran dolimî daristanî veşayî. No heywteyêk o qezaya Pulur, Çemîşgezek û Xozatî de şewatî domîyenî. Vera veşayîşê daristanan de her ke şono reaksîyonî zêde benî. Dêrsimijê ke vernîya Lîseya Galatasarayî de ameyî têhet çalakîya protestoyî viraştî.
Çalakîye de pankarta ke ser o ‘Dêrsim mîyanê çar koyan de yo, çar koyî zî mîyanê adirî de yî’ ameye akerdene û dovîzê ke ser o ‘Ya ke Dêrsim de veşena zerrîya ma ya’, ‘Dewleta qatile do hesab bido’ û sewbîna ameyî kiriştene. Hemsereka HDKyî û Parlamentera HDPyî ya Mûşî Gulistan Kiliç Koçyîgîte, Parlamenterê CHPyî yê Stenbolî Sezgîn Tanrikulu û xeylê temsîlkarê dezgeyan beşdar bîyî.
Îzehet hetê Serekê Federasyonê Komeleyanê Dêrsimî (DEDF) Alî Haydar Benî ra ame wendene. Benî va ‘şewatê darisatanan Dêrsim de bîyo çîyêko normal’ û wina domna: “Herçiqas ke şar waşt şêro şewatî hewna bikero, labelê hêzê asayîşî bi mehneya ‘herêma qedexe’ destûr nêdayî û ê bi xo zî mudaxale nêkerdî.”
Koçyîgîte zî qisey kerde û wina va: “Ma Dêrsim de şewatan 38 ra zanî. Dêrsim de darî tena dare nîyî, parçeyê kulturî yo zî. AKP hewl dano nê kulturî çinî bikero. Ma do vera nê polîtîkayan de wayîrê tebîet û newala xo bivejyî. Ma do vera yê ke tebîet rijnenî de pirran awan bikerî.”
PÎRHA / STENBOL