Weçînayîşê 24ê Hezîrane rê tena 4 rojî mendî û xebatê weçînayîşî zî ver bi peynîye şonî. Namzed û xebatkarê HDPyî Vakurê Kurdistanî de bajarê Amed, Êlih, Mêrdîn, Riha, Mêrsîn, Aydin û sewbîna xeylê cayan de xebatê xo domnayî. Hemsereka Pêroyî ya HDPyî Pervîn Buldane Buldane mîtînga Mêrsînî de qisey kerde û wina va: “Ma soz danî ke AKP do şêro, HDP bimano.”
Her ke weçînayîşê 24ê Hezîrane nizdî beno, xebatê ke seba weçînayîşî yenî kerdiş zî hendêna zêde û hîra benî. Partîya Şaran ya Demokratîke (HDP) xeylê qeza û bajaran de xebatanê xo domnena û nê xebatî ver bi peynîye şonî.
Namzed û xebatkarê HDPyî çarçewaya xebatanê weçînayîşî de bajarê Amed, Êlih, Mêrdîn, Riha, Mêrsîn, Aydin û sewbîna xeylê bajaran de lez dayî xebatanê xo. Qezayê Hezro, Çinar, Bismil û merkezê Amedî de xebatî virazîyayî. Bitaybetî Bismil de mîtînge ameye viraştiş û bi hezaran kesî beşdarê mîtînge bîyî. Beşdarvanî bi tilîlî û govende seba azadîya Rayberê Şarê Kurdî Abdullah Ocalanî silogan eştî. Heto bîn ra seba mîtînga Amedî veng ame dayîş.
Namzedan ra Dersîm Dage mîtînge de qisey kerde û wina va: “Heme hêzê Tirkîya bîyî yewe û wazenî ma binê bendê weçînayîşî de biverdî. Ma nêyî qebul nêkenî. Merdimanê ma qetil kerdî û bajaranê ma talan kerdî. Ewro hewl danî ma mergî reyde bitersnî, labelê ma nêtersenî.”
ÊLIH
Bajarê Êlihî de dewî ameyî zîyaretkerdiş û şar eleqeyêko gird nîşanê namzedan da. Cinîyê ke rayberîya TJA de ameyî têhet, seba mîtînge veng dayî şarî. Rayîrşîyayîş de siloganê ‘seba ke Heskîf çinî nêbo, rayî HDP rê’. Bi seyan kesî Heskîf zîyaret kerdî û şarê tîya bi çepikan destek dayî cinîyan.
MÊRDÎN
Qezaya Nisêbînî ya Mêrdînî de mîtînge ameye viraştiş û bi hezaran kesî beşdarê mîtînge bîyî. Herçiqas ke polîsî zextî kerdî zî şar bi coşêko gird ame warê mîtînge. Mîtînge de silogan, tilîlî û çepikî kêmî nêbîyî. Namzedan ra Pero Dundare mîtînge de qisey kerde û wina va: “Ma şert û şurtê şerî de mîtînge virazenî. Cok ra ma do vengê xo sindoqan de nîşan bidî. Ti kes nêşêno îradeya şarî bişikno. Îqtîdar 24ê Hezîrane de Sendromê Nisêbînî reyna hîs bikero.”
RIHA
Qezaya Pirsusî ya Riha de çend rojî verê 3 kesî hetê AKPyîjan ra ameybî qetilkerdiş û qetlîyamî ver qeza de tazîye dewam kena. Qezayanê bînan de xebatê weçînayîşî dewam kenî. Buroyê Pirsusî de hetê namzedê HDPyî ra tazîye yenî qebulkerdiş. Namzedan ra Nîmetullah Erdogmuş Sêwregi de, Alîye Kizildamare qezaya Bêrecugî de, Ayşe Surucu Serê Kanî de, Omer Ocalan zî qezaya Xelfetî de xebatê xo yê weçînayîşî domnayî.
MÊRSÎN
Bajarê Mêrsînî de bi beşdarbîyayîşê bi deshezaran kesan mîtîngêk ameye viraştiş. Mîtînge de qiseykerdişê namzedê HDPyî ya Serekkomarîye Selahattîn Demîrtaşî yê TRTyî ame nawitiş. Namzedanê Amedî ra Remzîye Tosune bale ante tecrîdî ser û va ‘seba ke ma cewab bidî tecrîdî, ganî ma wayîrê sindoqan bivejyî’. Hemsereka HDPyî Pervîn Buldane mîtînge de qisey kerde. Buldane wina va: “Bajarê Mêrsînî de kurd, tirk, ereb û sewbîna xeylê şarî têhet cuyenî û no eynî wext de profîlê HDPyî yo zî. Ewro herkes wazeno ke wa AKP şêro, ma zî soz danî ke AKP do şêro, HDP bimano.”
AYDIN
Rêxistina bajarê Aydinî ya HDPyî zî çarçewaya xebatan de şîye zîyaretê Rêxistina bajarî ya CHP. Dima ra seba mîtînga bajarî taxanê Telîdede, Yilmazkoy, Ovaemîr û Yenîkoyî de vilawekî ameyî vilakerdiş û şar eleqeyêko gird nîşanê namzedan da.
MERKEZÊ XEBERAN