Hêrişê dagîrkerî yê artêşa Tirk û çeteyanê ci de 26 rojî yo ke dewam keno. Şerwanê QSDyî xoverdayîşêko gird nîşan danî û derbanê girdî danî dagîrkeran ro. Şerwanan ra Dilxwaz Hesekêyî da zanayene ke dagîrkerî çiqas hêriş bikerî zî ê tepîya game nêerzenî. Şerwano 50 serrî zî va ‘merg bêrûmetîye ra başêr o’.
9ê Teşrîna verêne de artêşa Tirk û çeteyanê ci vera Vakur û Rojhelatê Sûrîye de hêrişê dagîrkerîye daybî destpêkerdene. Nê hêrişî roja 26. de bêmabên dewam kenî. Bitaybetî Til Temir, Zirgan û Kasimîye de xoverdayîşêko tarîxî yeno nîşandayene.
Çeteyê dagîrkerî hêrişê qezaya Zirganî ya Serêkanîyê kenî û ewja bombarduman kenî. Dewa Til Hirmusî ya Zirganî de mabênê şerwananê QSDyî û çeteyanê artêşa Tirkî de pêrodayîşî dewam kenî. Reyna çeteyan dewa Kasimîye de zî bi tanq, obus û sîlehanê giranan hêriş kerd. Bi cewabdayîşê şerwananê QSDyî pêrodayîş qewimîya û netîceyê pêrodayîşî de 4 wesayîtê zirxinî ameyî îmhakerdene. Ame musayene ke merde û birîndarê dagîrkeran zaf î.
Dewa Mahmûdîye yê Serêkanîyê de zî mabênê şerwananê QSDyî û dewleta Tirkî de pêrodayîşê şîddetinî qewimîyayî. Netîceyê pêrodayîşan de wesayîtêkê zirxinî yê dagîrkeran ame îmhakerdene.
Xoverdayîşê ma dewam keno
Şerwananê Hêzê Sûrîyeya Demokratîke (QSD) ra Dilxwaz Hesekê zî xoverdayîş de ca gêno û dîyar keno ke ê vera dagîrkeran de xoverdayîşê xo domnenî. Hesekêyî va ‘ma Vakur û Rojhelatê Sûrîye de çarçewaya pawitişê cewherî de xoverdayîşê xo domnenî’ û wina dewam kerd: “Ma erdê ti kesî dagîr nêkerdo, labelê dewleta Tirkî wazena erdanê ma dagîr bikera û şarê ma qetil kena. Ma do destûr nêdî înan.”
Ma do qet tepîya game nêerzî
Hesekêyî bale ante xoverdayîşê şerwanê ke tewr vernî de têkoşîn danî ser û wina va: “Dewleta Tirkî ya dagîrkere wazena herêma ma bigîro binê kontrolê xo. Herçiqas ke bi sîlehanê giranan hêriş kenî zî ma tepîya game nêerzenî. Dagîrkerî xoverdayîşê ma ver mecbûr manenî tepîya şêrî. Ewro seba azadekerdişê erdê xo xoverdayîşê ma dewam keno û ma do qet tepîya game nêerzî.”
ANHA / QAMIŞLO
Merg bêrûmetîye ra başêr o
Bi nameyê Ebû Elîyî de kesêko 50 serrî ke beşdarê xoverdayîşî bîyo, dîyar keno ke merg erdê xo de bi hawayo bêrûmet cuyayîşî ra başêr o. Ebû Elî Qamişlo de bîyo pîl û nika zî seba pawitişê bajarî xoverdayîşî mîyan de yo. Elî vano ‘mi vera Erdogan û çeteyanê ci de qerar girewt ke hetê şerwananê QSDyî de ca bigîra’ û wina dewam kerd: “Pawitişê welatê ma wezîfeyê herkesî yo. No wezîfe, wezîfeyê rûmet û şerefî yo. Nê erdî yê ma yî. Heqê ma esto ke ma bi hawayo azad ser o bicuyî. Merg erdê xo de bi hawayo bêrûmet cuyayîşî ra başêr o. Sey ciwanê ke şehîd bîyî, ez bawer kena ke ma zî şehîd bibî. Erjê nê erdan heme pereyanê na dinya ra hîna qîmetin o. Ez veng dana heme ciwanan ke wa erdê xo nêteriknî û bipawî.”