Vera îqtîdarê AKPyî de ma sey rojnameger, akademîsyen, roşnvîr, ciwan û cinîyê kurd, laz, çerkes, asûrî, ermenî, elewî, êzidî, xirîstîyan û mislimanî ameyî têhet û Koordînasyonê Merkezî yê Platformê ‘Nê’yî yê Ewropa awan kerdo.
Koordînasyonê Merkezî yê Platformê ‘Nê’yî yê Ewropa îzehetêko nuştekî da. Îzehetê platformî de ‘ameyo vatiş ke no platform averşîyayîş û beşdarbîyayîşî rê akerde yo’ û îzehet wina dewam kerdo: “Hedefo bingeyî yê platformê ma o yo ke vera no bedilîyayîşo ke zîhnîyeto tekperestî ma ser de ferz keno, ma kampanyaya ‘nê’yî bi hawayo hîra rêxistine bikerî.”
Wazenî daîm bikerî
Platformî îzehetê xo de vato ‘îqtîdarê AKPyî ke 7ê Hezîrane ra nata welatî açarnayo cayê şerî, qirkerdişanê xo Kurdistan de domneno’ û îzehet wina dewam kerdo: “Îqtîdarî teşebusê derbe seba menfîetê xo açarnayo firsendê bêvengkerdişê muxalîfan. Cok ra faşîzmê AKP û Erdoganî hemserek û parlamenterê HDPyî, rojnameger, akademîsyen, sendîkavan, temsîlkarê rêxistinê sîvîlan û sewbîna xeylê kesan tewqîf kerd û eşt hepisxaneyan. Nika zî wazenî nê faşîzmî bi bedilîyayîşêk daîm bikerî.”
Nîjadperestî tim ameyo pawitiş
Dewamê îzehetî de wina ameyo vatiş: “Qanûno bingeyîyê ke heta nika ameyî amadekerdiş, her tim çarçeweya nîjadperestî de amade bîyî. Cok ra kêmhûmar û neteweyê cîya yê ke Tirkîya de cuyenî, tim çinî ameyî hesibnayîş. Bedilîyayîşê ke do no referandûm de bêrî vera şarî, mîyanê ci de zî eynî çîyî estî. Sey ke qanûnê faşîstî yê ke mîyanê qanûno bingeyî yo verên de estbî, qîm nêkerî, nika bi nê bedilîyayîşî heme cîyayî bi temamî çinî yenî hesibnayîş. Eke ma bîyarî vîra xo, ma vînenî ke wextê Qanûno bingeyî yê 82yî de zî îqtîdarê o wextî veng dayêne û vatêne ‘eke şima wazenî wa leşkerî biagêrî qerargehanê xo, ganî şima nê qanûno bingeyî ra vajî ‘ya’. Bi no hawa komelî tehdît kerdbî. Îqtîdarê AKP û MHPyî zî ewro wina hereket keno.”
Sebebê vatişê ‘Nê’
Peynîya îzehetî de ameyo vatiş ke ‘ma sey bextwaştoxê ke Ewropa de cuyenî, qanûno bingeyîyo ke bi zorî şarî ser de yeno ferzkerdiş rê vanî nê’ û sebebê vatişê ‘nê’yî wina ameyî rêzkerdiş:
* No qanûno bingeyî vano ‘Yew Milet, yew ziwan, yew beyraqe û yew welat’ û bi no hawa estena kurd û heme cîyayîyan înkar keno. Bi ziwanê dayîke de perwerdeyî qedexe keno; cok ra ma vanî Nê!
* Sere de elewî, êzidî, ermenî, suryanî û sewbîna bawerîyê cîya cîyayan çinî hesibneno; cok ra ma vanî Nê!
* Seba ke heqê karkeran, grew, peymana komelkî û heqê xebetîyayîşî no qanûno bingeyî de çin o; cok ra ma vanî Nê!
* Nê bedilîyayîşî seba ke herinda heqê merdiman sîstemê dîktatorî esas gênî; ma vanî NÊ!
* Ti kes şarî ra girdêr nîyo; cok ra ma vanî Nê!
* Şar, netewe, bawerî û cinsî bi dîktatorîya yew merdimî nêeşkîyeno bêrî çinkerdiş; cok ra ma vanî Nê!
* Seba ke ma vera dîktatorîya ke cins, sinife, netewe û şarê bindestan çinî hesibnena û cîya kena rê vanî NÊ!
* Seba ke ma neteweyan rê seyyewbînanî, bawerîyan rê azadî û heqê laîkî, ciwan, cinî û roşnvîran wazenî; ma nê bedilîyayîşan ra vanî Nê!
Bêrê ma seba welatêko azad, demokratîk û seyyewbînan no referandûm de vajî Nê!
ANF/BRUKSEL