Gorê înan ma vurnayîsê sîstema qetilkare nêdîyenê û hora verva her çî vejîyenê.
Ma vat na referandum ra tewa nêvejîno, înan vat sima nêwazenê sîsteme bivurîyo.
Ma vat vurnayîs nîya dilapa dilapa nêbeno, înan vat bes nîyo hama heya.
Ma vat no mordemek nêwazeno ‘faîlî meçhul’ roşt kero, înan vat dewlete vurîna û tarî beno roşt.
Ma vat na partîye nêwazena anayasade moderne virazo, înan vat weçînîtîs ra tepîya beno. Ma vat no mordemek dîktator o, keşî de haştîye û qesey kerdene nêwazeno, înan vat beno beno.
Ma vat no mordemek nêwazeno mesela kurdan halbikero, înan vat famkorîye mekerê, 2005 de kurdan ra Amed de leborîna xo waste, nika TRT6 esto, endî îman bikerê!
Ma vat qesey kerdene meselan halnêkena, înan vat çond serrî nayê ra avê ma nêşîkîyenê nî meselan sero qesey bikeme, nika raye bena ra.
Ma vat dewleta sima bi se serran ma kiştîme, nika wazena se serre kî pê qesey kerdene ma bixapno û devam ra ma bikiso, înan vat halkerdena meselan rê waxt lozim o.
Ebi naye înan tertelê kurdan more kerd.
Bi taybetîye rojnama ‘Taraf’ RTE henke goynenê, mordemî xora vatenê ‘honde çî vurîno, honde rindekîye esta, ez bîne kor nêvînen’ çik o!
Wayîrê rojnama Ahmet Altan nika ebi xo gerre keno û vano hukumatê AKaPe vatîsê xo canêardê.
Hama çi xerîbo ke, jê mordemê kamilî ranêwirzeno û mara leborîne newazeno. Nêvano ‘qusirê mi de nîyamedê, sima vat mi nêzona ke RTE honde rind rol kaykeno.’
Tabî mordemê kamilî guna û xeta xo qebul kenê.
Hama poro sipe nîsana kamilîye nîyo.
Kamilîye bi serran kî nêna pêmitene. Eke esta esta, eke çîn a çîn a. Zerrê mordemî ra yena, mezgê mordemî ra yena kamilîye.
Hukumato tirk nika qetilkaran verdano ra, Ahmet Altan famnêkeno.
Hukumato tirk mordemê jê Mehmet Ağarî hepis nêkeno, hekîmo ke ceza da Mehmet Ağarî kar ra yeno vetene, Ahmet Altan famnêkeno.
Nika Hemed naleno, naleno û pers keno vano: honde waxto wajîno wayîrê sîsteme bêro vurnayene, sîstema kane bimano?
Ez ki van Hemed Hemed, eke endî ma fambikerê se beno, fammekerê se beno!
Sima poşt dê hukumatê RTE û hemkarê guna ey yê!