Aşkerebîyayîşê namzedan ra dima bitaybetî vera namzedanê HDPyî de konseptêko lêmin erzîya dewre û heta nika bi mehneyanê cîya-cîyayan xeylê namzedîya parlamenteranê HDPyî ameya betalkerdiş.
Senî ke namzedî dîyar bîyî, sifteyîn cezaya Îdrîs Balukenî ameye tesdîqkerdiş, dima ra doza KCKyî ke çend namzedê HDPyî tede estbî, ameye tesdîqkerdiş. Dima ra namzedîya Turgut Oker Û Pîr Zeynel Keteyî zî hetê YSKyî ra ameye redkerdiş.
Bajarê Frankfurtî yê Almanya de derheqê weçînayîşê 24ê Hezîrane de panelêk ame viraştiş. Panel hetê Koordînasyonê Weçînayîşî yê HDPyî yê Frankfurtî ra ame organîzkerdiş û Hemsereka KCDK-E Fatoş Goksungure û Turgut Okero ke namzedîya ci ameye redkerdiş, beşdar bi.
Panel de sifteyîn Goksungure qisey kerde û wina va: “Ma mecbûr î weçînayîşê 24ê Hezîrane qezenç bikerî. Cok ra ganî herkes merdimanê dormeyê xo îkna bikero. Tena rayîrê rijîyayîşê dîktatorîya AKPyî, bi serkewtişê HDPyî mumkin o.”
Dima ra Okerî va ‘elewîyî mîyanê HDPyî de ca gênî’ û wina domna: “Ma do bi heme hêzê xo hewl bidî nê bendê weçînayîşî û zulmî birijnî. Ma do vera sîstemê Yezîdî de bibî yew. Ma do nê qerarê YSKyî heta AÎHMî bîşêrî. Namzedîya mi qiseykerdişo ke mi serrgêra Qetlîyamê Gurgumî de kerdbî ver ameye betalkerdiş. Cok ra ez veng dana heme elewîyan ke wa dormeyê HDPyî de bibî yewe.”
Ma heta peynî hetê cananê xo de yî
Babete ser o Federasyonê Elewîyanê Demokratîke (FEDA) îzehetêk da. FEDAye îzehetê xo de vato ‘no qerar huqûqî nîyo, qanûnî yo’ û îzehet wina dewam kerdo: “Ma do heta peynî hetê cananê xo Turgut Oker û Zeynel Keteyî de bibî. No qerar vera komelê elewîtîye de derbeyêk o. Ma sey Federasyonê Elewîyanê Demokratîke bawerîya xo bi Heq û Heqîqete ardo û ma do vera zaliman de hetê Pîr Zeynel Kete û Turgut Okerî de bibî. Ma vera zulmê zaliman de reyna vanî HDP. Ganî elewîyî vera no qeraro neheq de wayîrê HDPyî bivejyî û destek bidî HDP. Hêzo ke ma Seyyîd Riza, Besê û Zerîfeyan ra girewto, ma do vera polîtîkayanê asîmîlasyonîstî de vindetişê xo yê rûmetinî bidomnî.”
Ma do wayîrê îdarekaranê xo bivejyî
Serekê Pêroyî yê Konfederasyonê Yewîya Elewîyanê Ewropa (AABK) Huseyîn Matî zî ser hesabê xo yê Facebookî ra reaksîyon nîşanê redbîyayîşê namzedîya Okerî da û wina va: “Ma de Yezîdî ra Yezîd yeno vatiş û ma cemanê xo de Yezîdan rê lanet wanenî. Ma nê Yezîdan vizêr zî şinasnayêne, ewro zî şinasnenî. Kamcîn îdarekarê ma hedef bêro nawitiş, ma do hetê ey de bibî. Ma do her şert û merc de wayîrê kedkaranê xo bivejyî. Kam ke vera xo bido embazanê ma, ê do ma vera xo de bivînî.”
MERKEZÊ XEBERAN