Pêroyina Dinya de vîlabîyayişê Vîrûsê Koronayî ra şarê Romanî zî tesîrêko gird dîyê û xo ra tarîx de Romanan her tim bandorê zilm û zordarî de mendê. 8 nîsana 1971î de bi beşdarîya 14 welatê ra delegeyan Kongreya Romanê Dinya ya Yewine ame viraştiş. Vera romanan a polîtîkayê nîjadperestî û cîyakerî ra na kongre de bertêko gird nîşan ame dayiş. Peynî zî 8ê Nîsane sey Roja Romanan yena pîrozkerdiş. Komelê Romanî tarîx de qet hektara şerêkî nêbîyê la her tim ameyê qetilkerdiş. Almanya de Hîtler bi mîlyonan Romanan qetil kerdê û ceribnayişan de zî sey kobay şuxilna. Tirkîya de zî çi heyfo ke vera Romanan polîtîkayê cîyakerî yeno şuxilnayiş. Romanan taybetî rasteyê perwerde, îstîhdam û weşî ra nêeşkenê feyde bivînê. Şarê Romanî vera Vîrûsê Koronayî xo pawitişî ser o keyeyanê xo ra nêvejîyenê labelê rayedarê dewlete zî hetanî nika hetkarîyêk înan ra nêresnayo û ê zî rayedaran ra hetkarî wazenê. Taybetî îxtîyacîya înan a kelmelê pankî esta. Wazenê dayişê faturayê awe, ceryan û gazê xozaye bêrê taloqkerdiş. MERKEZÊ XEBERAN