Berê Rojhelatî yo
Pîrê Ocaxê Sînemîlî Yuksel ciresna ke bi na kampe reyde hewl yeno dayîş ke heremê Terolarî de kayê lêminî bêrî kaykerdiş û kamî û kultirê înan destê înan ra bêrî girewtiş û wina verdewam kerd: “Serra 1978 de bi provokasyon û qirkerdişê hovane zafaneya elewîyan qetil kerdî û dayî koçkerdiş. Tay hetan ra ser kewtî zî. Nika zî deşta Pazarcix ke cayê elewîyan o de wazenî heman kayan kay bikerî. Nê kayî do tena bi Gurgumî bi sînor nêmano. Faşîzmê Îslamî yê Keske ya AKP wazeno şero ke Sûrîye de esto bi awayo bîn bîyaro tîya.”
Tîya hardê ma yê
Pîr Yuksel dergeyîya qalîkerdişê xo de wina vat: “Ma ra yeno waştiş ke ma ardê xo biteriknî û şêrî. Labelê ma do ardê xo nêteriknî û nêşêrî. Her çend ke hende qetlîyaman viraştî, ma rayna zî mendî. Vernîya çimanê heme dinya de hetê ekonomî û nufisî de parçe kenî. Hewl danî ma bihelînî û bidekî mîyanê vîrdozîya fermî. Seba nê beşdarkerdişî bê teredut cenî, doman, extîyar û her kesî qetil kenî û zey ke çîyo ke normal o nîşanê heme dinya danî. Tîya seba ma xeylê muhîm o. Roja ma ya eyroyên ke elewîyî hende raştê helînayîşî yenî û ma zî dijî nê têkoşîn danî de ma bêçareyî ke hîna zafêr xover bidî.”
Wazenî ma çinî bikerî
Pîr Yuksel bal ant ser muhîmîya yewîya hêzê dijî zilm û zordarî û wina domna: “Gurgum sey mîrasêkî ma rê mendo. Hetê kamîya elewîyeya kurdî ya Qizilbaş de tîya cayêkî muhîm o. Şima şêrî kamder ko û dewe şima do raştê zîyar, tirb û dergahêko pîroz bêrî. Tîya hetê manewî de hema merdiman rê wayîrî kena. Wexto ke ma tîya ra biqerfnî aye çax do têkîliya ma û kamîya ma zî biqerfnî. Bi tanq, top û çekan reyde eşkenî bidekewî tîya la nêşkenî tîya fetih bikerî û nêşkenî tîya de serbikewî. Zey ke pîrê ma zî vatî; Ser Dêrsimî sefer beno la serkewtiş qet nêbeno. Heman çî seba Gurgumî zî vîyarte yo. Ma do nêveradî ke zalimî bidekewî ardê ma û kêfa înan bêro. No ard, no welat û na herre heme yê ma yî. Ma nêşkenî sewbîna cayî de cîf bigîrî.”
HASAN YOLDAŞ/ANF