Sey her serre emser zî 4ê Nîsane yeno pîrozkerdiş. Heme pîrozkerdişan de sey waştiş azadîya Rayberê Şarê Kurdî Abdullah Ocalanî yeno waştiş. Endamê Meclîsê Dayîkê Aştî yê Êlihî seba serrgêra rojbîyayîşê Ocalanî amadekarîya pîrozkerdişî kenî û serrgêra rojbîyayîşî de qisey kerdî. Dayîkan ra Sultan Azboye (60) destpêka qiseykerdişê xo de wina va: “Heta ke Ocalanî reyde pêvînayîşî nêrî kerdiş, azadî nêbeno. Ma tena dîyayîşê Ocalanî wazenê. Dayîkî bermayîşî ra mird bîyî. Eke Ocalanî reyde pêvînayîş biameyêne destpêkerdiş do hende qetlîyam û gonî nêameyêne rijnayîş.”
Ma do şirî Amara
Dayîka Muhlîse Kinaye (60) qiseykerdişê xo de va ‘ez omid kena ke rojbîyayîşê Ocalanî bibo roja aştî û azadî’ û wina dewam kerde: “Înşallah serra bêra ma do Ocalanî reyde na roje pîroz bikerî. Roja bîyayîşê Ocalanî de ma do şêrî Amara û ewja de rojbîyayîşê Ocalanî pîroz bikerî. ”Dayîka Şukran Akkurte (45) zî qiseykerdişê xo de bale ante muhîmîyê azadîya Ocalanî ser.
“Homa sebrê Eyup Pêxemberî dayo Ocalanî
Dayîka Alîye Işike (70) va ‘heme domanî domanê ma yî’ û wina domnaye: “Ma nêwazenî domanî bêrî qetilkerdiş. Cok ra ma azadî wazenê.” Dayîka Elîf Tuluktemure (50) zî qiseykerdişê xo de azadîya Ocalanî waşte.Dayîka Menfîye Çelîke (70) zî derheqê serrgêra bîyayîşê Ocalanî de qisey kerde û wina va: “Homa sebrê Eyup Pêxemberî dayo Ocalanî. 19 serrî yo ke tena hepisxane de yo. Ocalan zî do sey Yusuf pêxemberî, rojêk hepisxane ra bivejîyo. Azadîya kurdan destê Ocalanî de ya.”Dayîkan ra Melahat Sarhane (42) qiseykerdişê xo de qala muhîmîya azadîya Ocalanî, aştî û qetilbîyayîşê domanan kerde.
DÎHABER/ÊLIH