Peymana Karê Komî (TÎS) yê ke mabenê Sendîkaya Behrê Tirkîya ke girêdayeyê Turk-Îşî yo (TDS) û Îzmîr Denîz Îşletmecîlîgî Naklîyat Turîzm ve Tîcaret A.Ş de ameybî îmzekerdiş de netîce nêame girewtiş. Badê nê pêvînayîşan karkerî Îskeleya Konakî de dest bi grevî kerdî û grevê înan kewt roja xo ya 7.
Karkeran vera vatişê Erdoganî ke vatbî ‘Ma OHALî seba cayê ke tede tehdîdê grevî estî de xebitnenî’ de qisey kerdî.Temsîlkarê TDSyî yê Şûbeya Îzmîrî û xebatkarê Îskeleya Konakî Alî Ekber Yildirimî wina va: “Heta nika ti gamî nêameyî eştiş. Karkerî şew û roje yenê xebitnayîş. Firsendê boydayîşî daxî nêdîyeno karkeran. Ma do bi hawayo qerardarî cewab bidî Erdogan û heta ke netîce bêro girewtiş ma tîya de yî.”
Ma do gamêk peyser nêerzî
Karkeran ra Tekîn Sagunî va ‘erjo ke ma heq kenê, nêdîyeno ma’ û wina dewam kerd: “Vatişê Erdoganî ra dîyar beno ke dewlete hetê kamî de ya. Serekkomar polîtîkaya teslîmgirewtişê îradeyî esas gêno, la ma do gamêk daxî tepîya nêerzî.”Karkeran ra tewr peynî Firat Şahînî qisey kerd û wina va: “Şar û karkerî baş zanê ke Erdogan dişmenê karkeran o. Cok ra vera nê vatişan de ez şaş nêbîya. Çi destê ma ra bêro, ma do bikerî. Vatişê winasî hîna hêz dano ma.”
DÎHABER/ÎZMÎR