Ma zî do rêça Kemalan de şêrî

Xoverdayîşê grevê vêşanîye yê vera tecrîdkerdişê Rayberê Kurdî Abdullah Ocalanî dewam kenê. Hepsîyê cinîyî ke Zîndanê Gebze de manenî, bi wesîleya Roja Dayîkan mektubêk dayîkanê xoverdayoxan rê nuşte.

Hepsîyan dayîkan rê va ‘şima seba ma rûmetê tewr hêja yê’ û wina domna: “Rûmet û rindekîya merdimîye zerrîya şima de gird bena û bena malê cimatî. Dayîkê hêjayî, ma zanê ke sereyê ma bidejo zî, zerrîya şima parçe parçe bena. Ma seba mergî nê, seba cuyêka birûmete xover danê. Ma teqîpkarê Mazlûm, Kemal û Sarayan ê. Senî ke înan bi bedenê xo zorê faşîzmê 12ê Êlule berd, ma zî zî rêça înan de zorê faşîzmê AKP-MHPî bîşêrê.”

Hepsîyan dewamê mektûba xo de wina vato: “Ma hêz û moral şima ra gênê. Mengêk o ke şima vera hêrişanê giranan ê faşîzmî de bi qerardarîye vernîya beran de, ma zî peyê beran de xover danê. Şima bi xoverdayîşê xo vengê ma resna temamê dinya. Ma qerardar ê, ma do ser bikewê. Bi qerardarîya serkewtişî û coşê xoverdayîşî, bi nameyê hepsîyanê zîndanan ma Roja Dayîkan a şima pîroz kenê. Ma lew nanê destanê şima yê bimbarekan ro.”

Dayîkî tepişîyayî, parlamenterî çalakîye de yî

Heto bîn ra Dayîkê ke vernîya zîndanan de destek danî çalakîya grevê vêşanîye, reyna raştê hêrişê hêzê dewlete ameyî. Dayîkê ke vernîya Zîndanê Bakirkoyî de çalakîye de bî, ameyî tepiştene. Dayîkan va ‘ma seba seyranî nêameyî tîya’ û wina dewam kerd: “Domanê ma mirenî. Ewnîyayîşê dêsê zîndanî zî beno sebeb ke hilmê ma abo.” Tepişîyayîşê dayîkan ra dima Parlamentera HDPyî ya Stenbolî Huda Kaya û Parlamentera HDPyî ya Mûşî Gulistan Kiliç Koçyîgîte çalakîya roniştişî da destpêkerdene.

 

AMED