Serokwezîrê tirkî heşto peyen koma partiya xo de halkerdena mesela kurdî sero qeseykerd. Hen qeseykerd, ke ti vana mordemekî pêro meselê Tirkiya halkerdê.

Gorê vatena Recep Tayyîp Erdoğan, hukumatanê virenan mesela kurdî halnêkerda, teyna makyaj kerda. Hukumatê AKP zî pêro meseleyan rê  çare diyo.
Halbike en makyajo girs hukumatê AKP kerdo. Çi ra? Hukumatanê  virenan estbiyayena kurdan qebul nêkerdenê. Gorê hukumatanê Ecevît, Çîller, Demîrel û Yilmaz kurdî çînê bî  û mesela kurdî çîne biye. Na semed ra mordem nêşîkîno înan ra halkerdena mesela kurdî bipiyo. Çike qebul nêkerdenê.
Lewê naye de hukumatê AKP estbiyayena kurdan qebul kerde. Recep Tayyîp Erdoğan bi xo 2005 de estbîyayena mesela qebul kerde. A roze ra na het zî “wazeno” ebi makyaj gorê xo mesela halbikero. Hata ewro zî mesela jê roza virene devam kena.
Bi hezaran însanê kurdî rîwalê siyaset ra hepisxanan derê. Zonanê ma de heqa perverde hona nêama dayene. Heqa zonê mayan de perverde berde kerde bavokê mektebanê taybetî. Ma qamçur dame dewlete, la dewleta gonewere qamçurê ma seweta perverdê tirkî ana kar. Makyajoke vanê, na wo.
Makyajo bîn zî kar ardena herfanê “Q, X û W” yo. Yanî alfaba ma fermî qebul nêkerde. Sawoke bi kar ardena nî herfan Recep Tayyîp Erdoğan mesela halkerda! Hukumatê AKP bi nî makyajan xo goyneno û hukumatanê virenan rexne keno.
Ebi tarîxê xora têrî amayene niya nêbena. însanêke rîwalê kar ardena kurdî ra bi serran hepisxanan de mendî, ejat dî, ameyî kistene, kes heqanê înan sero qesey nêkeno. Bi desan karkerê çapemeniya kurdî hetê dewleta Erdoğan ra ameyî kistene, la hukumatê Erdoğan hata ewro na neqiye berteraf nêkerda. No zi makyaj o.
Dawa Ergenekonî de xêle general û eskerî ameyî mehkeme kerdene  û ceza gurete. Nî eskerî kewt bî gonya kurdan. Hama na dawa de kes qetilkerdena kurdan sero nêvinet û kurdî hetê mehkemê tirkî ra jê dawakaran nêameyî qebul kerdene. Makyajo bîn zî na wo.
Nî rozan de azayê tîmên taybetî, Ayhan Çarkın, mehkeman de vano: “ Ma bêsevev kurdî qirkerdî.” La hukumatê AKP bêvengiya xo rameno û qetilkaranê jê Mehmet Ağar, Korkut Eken û Mehmet Eymür sevekneno. Nî qetilkaran ra hata na roze hesab pers nêbiyo û hukumatê AKP pêskarê nî qetilkaran nêbeno. Pekî no zî makyaj niyo!!
Dewleta  Erdoğanî kurdî tertele kerdê, Erdoğan leborîne nêwazeno. Hukumatê Erdoğan bi qirkerdena operasyonanê siyasî bi hezaran siyasetvanê kurdî estê zîndanan, ranêverdano. Vano: “Ma mesela kurdî halkerda.”
Hukumatê AKP çekê dewleta gonewere sanê xo miye, bi makyajê îslamî riyê xo boya kerdo, zulmê xo verva kurdan devam keno. En makyajo girs zî na wo.