Di van xebatan de mamoste pêşengiyê dikin. Mamosteyên Kurd ên di avakirina rêveberiya xweser de xwedî roleke girîng in, bi avakirina meclîsên xwe hewil didin civakeke perwerdekirî ava bikin. Mamosteyên Rojavayê Kurdistanê jî ji bo pergaleke perwerdeyê ya bi rêk û pêk amade bikin û hêza xwe bikin yek di nav hewldanan de ne. Bi vê armancê, li bajarê Girkê Legê mamosteyên kurd gihaştin hev û piştî civîna ku lidarxistin, Yekîtiya Mamosteyan saz kirin.


Armanc pergaleke demokratîk e
Civîn bi tevlîbûna endamên Meclîsa Gel, Tevgera Civaka Demokratîk û mamosteyên Girkê Legê û Herêma Aliyan pêk hat. Endamê TEV-DEM'ê Ferzende Munzur di civînê de bi bîr xist ku di vê pêvajoya aloz de, pêwîstiya gelê Kurd ji her demê bêtir bi xebatên rêxistinî heye.
Serokê Meclîsa Gel a bajarê Girkê Legê Ehmed Mele Hesen jî anî ziman ku armanc ji avakirina Yekîtiya Mamosteyan, avakirina sîstema demokratîk a perwerdeyê ye.
Piştî nirxandinan, Yekîtiya Mamosteyan hat avakirin û ji bo rêveberiya kar û xebatan komîteya ji 11 kesan pêk tê hat hilbijartin.

ANF/GIRKÊ LEGÊ