Hemserekê Heyetê Rayberdişî yê Meclîsê Şengalî Farîs Herboyî qala mesajê Rayberê Şarê Kurdî Abdullah Ocalanî yê ke pêvînayîşê avûkatan de seba Êzidîyan vatbî, kerde.
Herboyî mesajê Ocalanî sey mesajêko tarîxî hesibna û wina va: “Pêvînayîşê Ocalanî zaf muhîm ê. Bi xoverdayîşê şarî tecrîd ame şikitene. Mektûba Birêz Ocalanî şar û sazîyê Êzidîyan saf kerdî şa. Îmrali ra ma rê silam şawitî. Semedê ma manaya ci yo cîya esto. Semedê ma Êzidîyan tarîxêko newe yeno nuştene. No proses de Rayber Apoyî berpirsîyarîye girewte û komelê Êzidîyan rê wayîr vejîya. Ma raştê qetlîam, ferman û qirkerdişê îtîqat, ziwan û kulturî ameyî. Mesajê Ocalanî seba ma zaf erjaye yo. Ocalan azadîya Êzidîxanî esas gêno.”
Herboyî bale ante xoverdayîşê Êdizîyan ser û wina dewam kerd: “Îtîqatê Êzidîyan de cayê teslîmîyetî çin o. Êzidîyî heta nika komelêkê birexistine nêbî. Êzidîyî serranê 1990-97 de dimayê ercnayîşê Rayberîye yê ke vatêne ganî Êdizîyî xo rêxistine bikerî û bipawî, bedilyayî. Hêzanê dagîrkeran Şengal de destûr nêdayene Êzidîyî biwerzê lingan ser. Dimayê rijyayîşê rejîmê Sedamî Êzidîyî hîşyar bîyî. Hukmatê Başûrê Kurdistanî 2014 de Şengal de serdest bi, rojêk zî firsendê rêxistinbîyayîşê komelê Êzidîyan nêda.”
Destana Dewrêşê Evdî do bêro domnayene
Herboyî peynîya qiseykerdişê xo de wina va: “Gama ke DAÎŞ kewt Şengal, rayberîya 12 suwarîyan de yew qehremanîye ameye ciwîyayene. Şengal her hetî ra ame rexistinkerdene. Dimayê xalisnayîşê Şengalî YBŞ û YJŞ ameyî ronayene. Bi hezaran ciwananê Kurdan vera DAÎŞî de şer kerd û xoverdayîşêko tarîxî nîşan da. Bêşik o ke Şengal ganî xo bi xo îdare bikero. Ocalan raşt vano eke ma sey Êzidîyan yew mebê û xover medê, fermanê vera ma de dewam kenê. Destana Dewrêşê Evdî ya ke Ocalan qalê ci keno, ewro yena ciwîyayene û ma do bi xoverdayîşî na destane bidê domnayene.”
ANF / BRUKSEL