Parlamentera Partîya Çepe ya Parlamentoyê Ewropa Martîna Mîchelse ke seba piştî bida hemserek û parlamenteranê HDPyî, amebî Stenbol, derheqê prosesê referandûmî de qisey kerde û vînayîşê xo arde ziwan. Mîchelse va ‘goreyê vînayîşê ma, referandûm şert û mercê ke demokratîk nîyî de yeno kerdiş’ û qiseykerdişê xo wina domnaye: “Tewqîfbîyayîşê parlamenteranê HDPyî çîyêko dehşet o. Ma nînan ver etiryenî. Labelê eke şima mîyanê hereketêk de bibî, ancax o wext bedilîyayîş beno. Ez têmiyanîya ke Tirkîya de esta ver etiryena. Çimkî hetê heqê merdimîye, azadîya xo îfadekerdişî û azadîya çapemenîye de rewşe her ke şona xirabêr bena.”
Nîno qebulkerdiş
Mîchelse dewamê qiseykerdişê xo de va ‘tewqîfbîyayîşê parlamenteranê HDPyî nîno qebulkerdiş’ û dewam kerde: “Ma avûkatanê parlamenteran reyde pêvînayîş kerd. Nê parlamenterî seba ke waştî çarçeweya azadîya îfadeyî de bixebetyî, ameyî tewqîfkerdiş. Ma waşt parlamenterê ke hepisxane de yî, zîyaret bikerî, la seba nêyî destûr nêame dayîş.”
Eke komel vajo nê
Martîna Mîchelse qiseykerdişê xo de qala referandûmî kerd û wina va: “Referandûm şert û mercanê baş de nîno kerdiş. Bitaybetî referandûmî ra ver zaf manîpulasyonî ameyî kerdiş. Ma nînan ver etiryenî. Etiryayîşê ma yo bîn zî tewqîfbîyayîşê kesê ke vanî ‘nê’. Her çiqas ke rewşe baş nîya zî eke heme hêzê komelî bibî yewe û vajî nê, o wext beno ke bedilîyayîşî bibî.”
Wezîfeyê her kesî yo
Mîchelse peynîya qiseykerdişê xo de wina va: “Ez seba ke ameya Tirkîya kêfweş a, labelê muameleyêko mi tîya de dîye ver ez etiryaye ya. Ez tîya ra veng dana welatîyê ke do vajî nê. Eke şima mîyanê hereketêk de bî, o wext beno ke bedilîyayîşêk bibo. Ma rewşa şopnayîşî de yî û ancax ma eşkenî zextan hukmatî ser de bikerî la wezîfeyê bedilnayîşî keweno milê şarî ser de yo.”
ŞÛJIN / STENBOL