Masa dêmdiye. Na masa de gune mesela kurdî halbibiyenê. Hama hen oseno, ke masa dêmdiya. Çelîkê Osmanî onca zur kerd.

Tabî zurê Osmanî nêqedînê.
Îta de wazen simarê jû hekate binusnî: Waxtede jû dewe de jû mordemeko zureker biyo. Hostayê zuran biyo. Zurê henenî kerdê, ke herkes pê qanbiyo.
Tabî, mordemek her ca de xo goyneno û vano: “Mira rind kes zurnêkeno.”
Rozê dewizî yenê pêser. Nînan ra jû dewiz vano: “Mi cayê jû zureker hesna, wille kes honde ey rind û rindek zurnêkeno.” Dewizî qerar cenê û zurekerê dewa xora vanê: “Ti honde xo goynena, ma cayê jû zureker diyo, ti ey de basnêkena.”
No caz af dûrî beno. Zureker adrese ceno kuno raye. Zaf sono ton sono pers keno asman ra tepiya çê zurekerê bînî doskeno. Dano çever ro, lazekode qickek çever keno ra, niyadano ke jûyo xam o. Lazek vano: “Apo ti xêr ama, kerem ke bê zerre!”
Mordemek vano: “Apo gorî piyê to kot yo? Ez wazen piyê to de qeseybikerî.” Lazek dot ra cereno ci vano: “Apo xevere amê, vanê asmên diriyo, piyê mi la û goçenî gurete şî, asmên derzeno.” Mordemeko zureker naye ser sas beno, xo xora vano: “ Na domonke niya zurkeno, ma piyê neyî sene xezevan vaydano” û peyser cereno ra yeno dewa xo.
Na biya fênda halkerdena mesela kurdî yê siyasetvavnê tirkî. Pêro zurkenê. Demîrel vatenê: “Eke fekê çemê Firat de voreka sima bena vîndî, bêrê hesav mira perskerê.” Mesut Yilmaz vatenê: “ Raya jûyena Avrupa Diyarbekîr ra vêrena ra.” Siyasetvananê tirkî ameyî bî serdest, zurê xo kerdî vêrdî ra şî.
Qomê ma zî her tim partiyanê dewleta tirk ya terorîste rê yardim kerd, çînîtî we.
Tamam siyasetvananê tirkî zurkerd şî, hama noyo ke peyecoy ame pêroyîne ra tenana zureker o. Xezevan vaydano. No zî Recep Tayyîp Erdogan o.
Eke biyo serdest nêbiyo, vano” Ez na mesela halken.” Hama hat ewro zî halkerdena mesela de jû gama bingehine nêesta.
Nika onca tehdît keno vano “Sima ke niya qeseybikerê, dem qedîno.” Masa hora rew ra demdiya, nika keno eskera. Çike zerrê nî 9 asmanê peyenan de kesike vejiye ro dare ser, çelîkê Osmanî hona binê dare nêamê bîle.
Ahmet Turk serokwezîro tirk rexne kerd, desinda heyet ra guret. Sirri Sureyya Onder şî Gezî, desinde heyet ra guret. Nika hemserokê BDP Selahattîn Demîrtaş derheqê paketa ‘demokratîk kerdene’ yê Erdogan de fikrê vat, o zî heyet ra ceriya û nêşîkîno şero Îmrali.
Dîktatoriya ke vanê na wa. Halkerdena mesela bi na tore nêbena. Dîktator vano: “Bêrê telîm bibe” û kurdan tehdît keno.