30ê teşrîna verêne de Hemserekê Şaredarîya Bajarê Girdî yê Amedî Gultan Kişanake û Firat Anli ameybî tewqîfkerdiş û şewa 1ê teşrîna peyêne de zî seba şaredarîye qayûm ame tayînkerdiş.
Babete ser o Wekîlê Hemserekîya HDPyî Îdrîs Balukenî qisey kerd.
Seba hedefanê xo her tewir faşîzm yena bikarardiş
Balukenî va Şaredarîya Bajarê Girdî ya Amedî rê tayînkerdişê qayûmî dewamê prosesê derbeya sîvîlî ke hukmatê AKPyî 15ê temuze ra dima dayo dest pêkerdiş o û qiseykerdişê xo wina domna: “AKP bi nînan mesajê girdkerdişê hêrişanê xo dano. Na derbe rasterast vera îradeya şarê kurdî de ameya kerdiş û tîya de yê ke hedefî de yo îradeya şarê Tirkîya yo. Yew rejîmo ke vera talebanê şarê kurdî de bi huqûqê dagirkerîye nizdî beno, esto. Tîya de çîyo ke keweno milê şarê ma, ganî xoverdayîş û têkoşînê xo bêmaben bidomnî.”
Rîyê înan yê raştîkên vejîya werte
Balukenî dewamê qiseykerdişê xo de va hukmatê AKPyî bi polîtîkayanê xo wazeno qezencanê şarê kurdî û yê şarê Rojhelato Mîyanênî çin bikero û wina dewam kerd: “Yê ke vanî wa Mûsilî mûsilijî, Helebî zî helebijî îdare bikerî, rîyê înan yê raştikên Amed de vejîya werte. Ewro bi karmendê dewlete ke Enqere ra yenî tayînkerdiş wazenî Amedî îdare bikerî û no huqûqê dagirkerîye yo. Şarê Amedî do nêyî qebûl nêkero. Tena şarê kurd nê, yê ke hetê demokrasîye de ca gênî, ti kes do qebûl nêkero. Heme kesê ke hetê demokrasîye de yî, ganî ewro hetê şarê kurdî de ca bigîrî. Ma encax eşkenî bi no hewa netîce bigîrî.”
Ganî ma nê ferasetî xirabe bikerî
Balukenî qiseykerdişê xo de vengdayîşê têkoşîn û rêxistinîye kerd û qiseykerdişê xo wina qedêna: “Erdogan ewro bi polîtîkayanê faşîstan wazeno xo payan ser de bigîro. Nê hêrişanê ke keno, hêzbîyayîşê ci ra nîyo, bêhêzbîyayîşê ci ra yo. Çimkî o aqûbetê xo nika ra vîneno. Nê semedî ra şarê ma ganî vera na derbe de mîyanê bawerîyêka gird de rêxistinîya xo awan bikero. Reyna ma ganî xetêk têkoşînî awan bikerî ke wa nê ferasetî xirabe bikero.”
AMED / MELEK YUKSEL / ANF