Maya min a dêrsimij; min tîp wendene. To zehf ardim min ra kerdene. Min zî waştene ez tîp biwanî. La belê ti nêweş kewtî. Wextê kî ti nêweş ketî min xo ra persa maya min semedê çî nêweş kewta? Min waşt derman bikerî. Wextê ko min semedê nêweşîya to cigeyrayiş kerd. Min vîna ke dermanê nêweşîya to wendişê min bi. Min zanîngeh wendênê la to ra derman nêbîyê. Ay ra zî min waşt ke ez dermanê to ser de cigeyrayişan bikerî min oca de dest pêkerd.
Maya min a dêsimij; komelbîyayişê Dêrsimî heme nêweşa. Nêweşîya ruhî ya. Wexto serewedarnayişê Seyîd Rizayî virazya û pê bombeyan kemelbîyayişî qetilkerdene dest pêkerd. Ser Dêrsimî de a roj pey varan nîvara ser komel bombeyî vara. Edî şarê ma honra şîy. Honî ke zehf giran bî. Zanîngehî de min zî wendenê waştêne kî ez zî honî de bimanî. Dermanê to oca de çînê bi. Min waşt to derman bikerî. Min waşt komelî Dêrsimî derman bikerî pey Seyîd Rizayî ra dim şar kewt hewneke zaf giranine.
Maya min a dêrsimij; min eşnawit bi kî wexto ke, lacî şîy serewedarnayişî mayan nêpersa. Çimkî zanaynê ke êy şinê dermankerdişê şarê xo. Komelî kî zereyî dejeno ra derman geyrena. Semedê ya ra zî may nêpersay lacan ra. Her wext pey lacî xo de şina ya ra ardim kena. To zî hina kerdênê ez zanena lê…
Maya min a dêrsimij; qirkerdişê Dêrsimî ti zanê. Pey qirkerdişê xozaya Dêrsimî de zey verû nêbena, awa Mûnzûrî zey cewherî xo nêherikyena. Ma zî zey cewherê xo nêbenê. Ez cewhera to geyrena maya min. Ez Seyîd Riza geyrena. Ez ha cayê xo de, cayê Alîşêr, cayê Zarîfe, Cayê Besê de ya.
Vaj îna ra, maya min. Vaji Seyît Riza vato: “Min dek û dolabêy şima fam nêkerd, in min rê bi derd, la min ver şima de çongê xo nêard war en zî wa şima ra bibo derd.”
YALÇIN YANAR / Zîndana Tîpa F ya Sêrtî