Mayê şehîdanê “cêrzemînê wehşetî” yê Cizîrî aşkere kerdî ke, komkiştenê Cizîr, Şirnex, Nisêbîn û Sûrî besê vatişê 'Nê’ kenê û seba ke komkiştenî reyna nêvirazîye, veng day her kesî ke vengê ‘Nê’ bidê.
Qezaya Şirnex Cizîr de cêrzemînan de 250 ra vêşêr welatijê sivîl bi hawayekê wehşî amey qetilkerdiş. Cêrzemînê Cizîr vîr û mezgê civaka Kurd de, dê ti wext nîrê vîrakerdîş. Mayê şehîdanê ke “cêrzemînanê wehşetî” yê Cizîr de amey qetilkerdiş, derheqê referandûmê 16'ê Nîsane de ANF rê qisey kerdî. Dayikan seba fina da bîn qetlîamê nêqewimyê vengê ‘Nê’ day.
Maya Endamê Meclîsa Partî yê DBP Mehmet Yavûzel, Hanim Yavûzel da zonayen ke, iyê dê seba ke sozê şehîdan bîrayê ca, vajê 'Nê’. Yavûzel vist vîrî ke bi seyan domanê înan bi hawayekê wehşî cêrzemînan de amey qetilkerden û wina dewam kerd: “Rixmo ke zerrya ma veşena zî ma reyna zî vanê wa haştî virazîyo, wa hindî însanê ma nîrê kiştiş. Tenya waşteneke wa esta, a zî na ya ke, ma hinî wazenê ke wa domanê ma azad û mîyanê haştî de bicuwîye. Domanê ma “cêrzemînanê wehşetî” de amey qetilkerden, wa tornê ma bişerê azad bicuwe. Nayî ra ma mayê zerrî bijan vanê ‘Nê, Nê, Nê.”
‘Ma zî soz danê domananê xo, ma dê xover bidê’
Dayik Hanim Yavûzel da zonayîş ke seba rojanê azad yê welatî iyê dê zî zey domananê xo, xover bidê û wina va: “Seba rojanê azad û haştîye, domananê ma bi rojan cêrzemînan de xover day û heta peynîya cuye têkoşîn kerdî. Ma zî soz danê domananê xo, heta rojanê azad, ma dê xover bidê û na munasebetî ma dê kiştoxanê domananê xo ra vajê ‘Nê’. Zerrya ma veşya, wa zerrya mayanê bîn nêveşo. Ez zey dayikeka zerrîveş veng dana pêrokîn şarê Riha ke, seba ameyoxa welatî û vernîgirewtişê komkiştenan vajê ‘Nê’.”
Yavûzel peynîya qiseyanê xo de bi vatenanê ‘Bêrê ma pêro pîya hemverê zilmî destê xo bidê yewbîn û vajê ’Nê’ her kesî ra waşt ke têkoşîna xo berz bikerê û 16ê Nîsane de vengê ’Nê’ bidê.
‘Seba domanê ma yê ke amey veşnayîş ’Nê’
Maya Midûrê Karê Nuştişî yê Rojnameya Azadiya Welat Rohat, Melîha Aktaş zî vist vîrî ke iyê dê bi venkegê xort, 16'ê Nîsane de vajê 'Nê' û va, ‘Rîwalo ke wehşeta ke ardî sereyê ma, rîwalo ke bi ganî domanê ma cêrzemînan de qetil kerdî û veşnay, ma dê vajê ’Nê.’
Aktaş qiseyanê xo de behsê sebebanê ‘Nê’ kerd û wina va: “Rîwalo ke dewleta wehşî, Cizîr û Gimgim de bedenê keyneyanê ma teşhîr kerd ma dê vajê ’Nê.’ Ma dê qirkerdiş û tecawizî rê vajê ’Nê.’ Ma dê dîktatoriyê rê vajê ’Nê.’ Ez do kiştoxanê Rohatê xo û Mehmedê xo ra vaja ’Nê, Nê, Nê’”
‘Seba ke komkiştenî nêbê ’Na’
Melîha Aktaş vist vîrî ke eke eke referandûmê 16'ê Nîsane de vengê ‘YA’ bivejyo, do vêşêr domanê înan wehşetanê cêrzemînan de bîrê veşnayîş û wina veng da weçîntoxan: “15 serrî yo ser hukm de yê, 15 serrî yo ke domanê şarê Kurd yenê qetilkerdiş. Bi sîstema Serokîye ra teba nîno vûrrnayîş, eksê ci do kiştişî berz bibê. Seba kerdenanê Cizîr, Şirnex, Nisêbîn û Sûr vatişê ‘NÊ’ bes nêkeno. Ez veng dana pêrokîn dayikan ke seba koşkiştişî reyna nêvirazîye, wa vajê ‘Nê’.
OMER ÎKE / ANF / RIHA