Wezîrîya Perwerdeyî ya Milî (MEB) çarçeweya planê sermayegozarî ya 2017-2019î de seba Lîseyê Îmamhatîpî (ÎHL) 1.7 mîlyar û Lîseyê Fenî rê zî 109.6 mîlyon TL butçe cîya kerde. Heto bîn ra MEB qanûnê ‘Komele Akerdiş, Girewtiş û Name Dayîşî’ rojnameyê fermî ser o weşênaye û kerde fermî. Qanûno newe de nuqtaya tewr balkêş heme komeleyan de bîyayîş û ferzkerdişê destmajxane û mescîdî yo. 10 serrê peyênan de bi hezaran ÎHLyî abîyî. Babete ser o Serekê Şûbeya Edene yê Egîtîm Senî Seçîl Sonmeze û Serekê Şûbeya Komeleya Kulturî ya Pîr Sultan Abdalî (PSAK) Şukru Şahînî qisey kerdî.
Welatêko sunîyan hedef kenî
Sonmeze qiseykerdişê xo de wina va: “Goreyê qanûno newe heme taxan de ÎHLyî do biabî. Şarê ma yo feqîr zî do mecbur bimano ke domanê xo bierşawo nê mekteban. Dewlete wana ke eke şima domanê xo bierşawî mi rê, ez do înan bikera mala. Hedefê qanûnan o yo ke şar mecbur bimano ke domananê xo mektebê ÎHLyî de bido wendiş. Dewlete fehmê sosyalî yê dewlete ra dur a û seba domnayîşê sîyaseto mewcut û saltanetî xizmet kena. Welatê ma de kulturê û bawerîyê cîya-cîyayî zaf î. Hedefê sîsteme o yo ke welatê ma bikero welatêko sunîyan.”
Tewr peynî Şahînî qisey kerd û wina va: “Mufredat û teorîyê evrîmî ameyî wedarnayîş û mescît yeno ferzkerdiş. Hedef o yo ke neslêko dîndar bêro resnayîş. Heta ke cuntaya faşîste ya 12 êlule biba do wendiş de ferzkerdişê dersê dînî û bêhuqûqî dewam bikerî. Welatê ma de dînê dewlete çin o. Dewlete nêeşkena ke mabênê dîn û bawerîyan de cîyayêyan bikera.”
DÎHABER/EDENA