Vera polîtîkayanê asîmîlasyon û redkerdişî de bi rayberîya Federasyonê Bektaşî yê Elewîyan ‘Meclîsê Pîran’ ame awankerdiş. Meclîs badê ke 12 herêman de pêvînayîş û pêkerdişê pîr, huqûqnas û komeleyê elewîyan virazîya, awan bî. Serekê Heyetê Bawerî yê Bektaşî û Elewîyan Huseyîn Guzelgulî qisey kerdişê xo de qala awanbîyayîş û hedefê ‘Meclîsê Pîran’ kerd.Guzelgulî destpêka qiseykerdişê xo de bale ant bawerîya elewîyan ser û wina va: “Ma do goreyê layîqîya tarîxê xo probleman çareser bikerî. Ocax û dergahî elewîtî ardî roja ma ya ewro. Meclîsê ma do elewîtîya rastikên xo rê esas bigîro. Şarê elewî nêeşkenî bawerî û îbadetê xo bîyarî ca. Elewîyî kulturê xo ra ameyî durî vistiş. Cok ra ma lazimî dî ke meclîs awan bikerî.”
Cuyayîşê sîstemo kehen
Guzelgulî dewamê qiseykerdişê xo de va ‘verê cû ti kes nêşînê fekê berê dewlete, her çî mabenê şarî de ameyêne çareserkerdiş’ û wina qedêna: “Verê cû qadî, mehkeme, qereqol û dozgerî çinêbî. Ma seba cuyayîşê sîstemo kehen, meclîs awan kerd. Ma şerê bîyayayîşî meşnenî. Keso ke qala demokrasî keno dîktator bi xo yo. Wa her kes hayîyê nê polîtîkayan de bibo.”
DÎHABER/STENBOL