Çapemeniya Erdogan
15ê meng ra tepya zafê rojnameyanê tirk vatena “pakîn” veti manşetê xo. Buroyanê xo de roniştîbî û maseyan sero, xeberê zûrî nûsnayê.
Rojnameyan qalê operasyonê bi hezaran leşker, bi desan general û destegê asmenî kerdê. Nûştoxê tirk zey general û mûxabîrî jî zey sûbay û tîmê taybet hereket kerdê. Pawitî ke, 15 û 16ê meng de, bi temamî xoverdayişî bişkînê. La belê xoverdayiş roj bi roj bi gird. Tanq û topan nêşayê şirê ravey. Cok ra Erdogan û Davutoglu ra piya, kamîn rayverê tirk fekê xo akerdê, kurdî tehdît kerdê, qalê kişten û werte ra hewadayin kerdê. Her fina ki xoverdayiş gird biyê, ziwanê rayveranê tirk û medya tirk xeripiyayê.
Planê çinîkerdişê kurdan
18ê meng de zafê rojnameyê tirk bi vatena “çinîkerdişê kurdan” vejiyayî. Bê ke şirê cayê xoverdayiş û pirodayişan û bê ke rastiyan bivînê, hayderiyê artêşa tirk û waliyan zey xeber kerdî vila. Kurdan badê nê manşetan, nameyê “zûrnamey” da nê rojnameyan. Rojnameyê tirk serva lejê Kurdistanî artêş û walî zey çimeynî û şahîd mûsnayê. La belê her çiqe çimeyniyê înan eynî bi jî, bîlançoyê artêş û walî jî, pênêgirotî. Jew rojnamey 68. jewê bînî 75, jewê bînî 56 û jewê bînî 110 kurdî maseyanê xo sero, bi zûrî kiştê.Winî kerdê ke, jew kesê dirbetin jî xo pey de nêternayê û çike fanteziyê înan de, teniya kiştenê kurdan esto.
NAVENDÊ XEBERAN