10ê teşrîna verêna 2015î de Anqara de wextê mîtînge de bombeyî amebî teqnayene û bi seyan kesî merdbî û hendêna zî birîndar bîbî. Fotografkêş û nuştox Ozcan Yamanî zî babete ser o Wezîrîya Karê Zereyî gerre kerdbî û netîceyê doze de tazmînat qezenç kerdbî.
Rojnameyê Evrenselî ra goreyê xebera Burcuy Yildirime; dima ra wezîrîye îtîrazê doze kerdo û Mehkemeya Îdareyî ya Herêmî ya Anqara zî qerarê ‘tazmînat do bibo sebebê dewlemendbîyayîşê bîlasebebî’ dayo. Qerar de ameyo vatene ke tena şahidîya hedîseyî kerdene û cuyayîşê travmayî seba tazmînatî bes nîyo. Mehkeme qerar de îdîa kerdo ke derheqê estena Yamanî ya cayê hedîseyî de delîlî çin î û doze red kerdo.
Fotografê ke Yamanî antbî, hetê ajansê xeberan yê AFP ra amebî weşênayene û Yaman dima ra musabeqaya fotografan de xelate zî girewtbî. Avûkata Yamanî Songul Beydîllîye dîyar kerde ke fotografê ke muwekkîlê aye antî estî, ê do seba raştkerdişî muracatê mehkeme bikerî, labelê eke qebul nêbo ê do muracatê Mehkemeya Qanûno Bingeyî bikerî.
AMED