Hewteyêk verê hemserekê HDPyî yê verênî Selahattîn Demîrtaş û Fîgen Yuksekdage ameybî mehkemekerdene û ewil qerarê tehlîyebîyayîşî amebî dîyayene, labelê dima ra bi mudaxaleyê îqtîdarî eynî dosya ra qerarê tewqîfbîyayîşî dîya.
Parlamantera HDPyî ya Edene Tulay Hatîmogûllari derheqê qerarê neweyî de qisey kerde. Hatîmogullari vist vîrî ke Tirkîya de hukm xoser nîyo û mehkeme goreyê vatişanê şexsêkî û temsîlkaranê ey tê gêrena.
Hatîmogullari dîyar kerd ke Demîrtaşî beraat kerd û mehkemeya pîle zî qerar tesdîq kerd û wina dewam kerde: “Hûmara dosya ameye vurnayene newe ra ame mehkemekerdene. Xeber ameye û lezabez ma pêro embazanê xo reyde şîyê edlîye, uca vatêne ke ca de derbazê SEGBÎSî bibê la ma bi saetan korîdor de vindertî. Uca de bi saetan xîret kerd ke dadgerî îqna bikerê. Seba ke dadgero ke no qerar girewt zanayêne ke siba yan zî wextêkê bînî do bêro mehkemekerdene. Naye ra ma 3-4 saetî korîdor de vindertî. Dima dadger ame û qeraro ecêb ê huqûqî da. Tirkîya de îqtîdar bi mehkemeyan kay keno, mehkemeyî bîyî kayê îqtîdarî. Ê hewl danê Mehkemeya Heqanê Merdiman a Ewropa û mehkemeyanê Ewropa bixapênê. Labelê ê bi xo zî zanê ke kes înan ra bawer nêkeno. Tirkîya de hînî bawerîya kesî bi mehkemeyan çin a.”
ANF / EDENE